جہلم میں سنگھوئی کے قریب دو موٹر سائیکلوں میں خوفناک تصادم سے دو نوجوان جاں بحق جبکہ 16 سالہ لڑکا زخمی ہو گیا۔
تفصیلات کے مطابق جہلم پنڈدادنخان روڈ پر سنگھوئی کے قریب تیز رفتاری کے باعث دو موٹر سائیکلوں کے درمیان تصادم کے نتیجے میں دو نوجوان موقع پر ہی جاں بحق ہو گئے جبکہ ایک 16 سالہ لڑکا زخمی ہو گیا۔
ریسکیو حکام کے مطابق ریسکیو 1122 کو جہلم پنڈ دادنخان روڈ پر سنگھوئی کے قریب دو موٹر سائیکلوں کے تصادم کی اطلاع موصول ہوئی۔ اطلاع ملتے ہی ریسکیو ٹیم فوری طور پر جائے حادثہ پر پہنچ گئی اور امدادی کارروائیاں شروع کر دیں۔
ریسکیو ٹیم نے جاں بحق ہونے والے دونوں افراد کی لاشوں اور زخمی لڑکے کو ضروری طبی امداد فراہم کرتے ہوئے ڈسٹرکٹ ہیڈ کوارٹرز (ڈی ایچ کیو) ہسپتال جہلم منتقل کر دیا۔
ریسکیو 1122 کے مطابق جاں بحق ہونے والوں کی شناخت 18 سالہ حبیب الرحمن ولد علی اکبر اور 29 سالہ وسیم احمد ولد محمد آزاد کے نام سے ہوئی ہے جبکہ زخمی نوجوان کی شناخت 16 سالہ حسن ولد عارف کے نام سے کی گئی ہے۔
ابتدائی اطلاعات کے مطابق حادثہ دونوں موٹر سائیکلوں کی تیز رفتاری کے باعث آمنے سامنے ٹکرانے سے پیش آیا۔
