دینہ: پولیس نے اہم کارروائی کرتے ہوئے غفلت اور لاپرواہی سے ٹرک چلا کر حادثہ کا سبب بننے والے ڈرائیور کو گرفتار کر لیا جبکہ حادثے میں ہیلپر جاں بحق ہو گیا۔
تفصیلات کے مطابق تھانہ دینہ پولیس کو اطلاع ملی کہ ایک ٹرک ڈرائیور نے سڑک کنارے غلط پارک کیے گئے کنٹینر کو ٹکر مار دی، جس کے نتیجے میں ٹرک کا ہیلپر شدید زخمی ہو کر موقع پر ہی دم توڑ گیا۔
اطلاع ملتے ہی ایس ایچ او تھانہ دینہ اور پولیس ٹیم فوری موقع پر پہنچی اور کارروائی کرتے ہوئے ٹرک ڈرائیور کے ساتھ ساتھ کنٹینر کو غلط پارک کرنے والے ڈرائیور کو بھی گرفتار کر لیا۔
پولیس کے مطابق دونوں ملزمان کے خلاف قانونی کارروائی کا آغاز کر دیا گیا ہے۔
پولیس حکام کا کہنا ہے کہ ٹریفک قوانین کی خلاف ورزی اور لاپرواہی کسی صورت برداشت نہیں کی جائے گی۔ عوام سے اپیل کی گئی ہے کہ ڈرائیونگ کے دوران احتیاطی تدابیر اختیار کریں اور سڑکوں پر گاڑیوں کی درست پارکنگ کو یقینی بنائیں تاکہ قیمتی انسانی جانوں کا ضیاع روکا جا سکے۔
