پنڈدادنخان: شکایت کنندگان ملک محمد ممتاز اعوان اور نوید عمر ریحان نے محتسب پنجاب ریجنل دفتر جہلم میں درخواستیں دائر کیں کہ ان کے گاؤں کندوال تحصیل پنڈدادنخان میں واٹر سپلائی کا بہت بڑا مسئلہ جس کی وجہ سے لوگ پانی جیسی بنیادی سہولیات سے محروم ہیں۔
اس حوالے سے اصل حقائق کی جانچ پڑتال کرنے کے لئے ایڈوائزر صوبائی محتسب پنجاب اشفاق احمد رانا نے اسسٹنٹ کمشنر پنڈدانخان، ایگزیکٹو انجینئر، سب ڈویژنل آفیسر، پبلک ہیلتھ انجینئرنگ ڈویژن جہلم و ہمراہ دیگر عملہ موقع کا معائنہ کیا۔
اس موقع پر دفتر محتسب پنجاب کے اغراض ومقاصد کی آگاہی کے لئے لوگوں میں پمفلٹ بھی تقسیم کئے گئے جس پر لوگوں نے ایڈوائزر محتسب کا شکریہ ادا کرتے ہوئے کہا کہ وہ اشفاق احمد رانا ایڈوائزر صوبائی محتسب پنجاب جہلم اور ڈاکٹر حلیمہ منیر اسسٹنٹ کمشنر پنڈ دادنخان کے انتہائی شکر گزار ہیں جنہوں نے موقع پر پہنچ کر معائنہ کرکے ان کے دیرینہ مسئلہ بابت واٹر سپلائی کو ترجیحی بنیادوں پر حل کروانے کی یقین دہانی کروائی ہے۔
