دینہ کے نواحی علاقہ میں مویشی چوری کی بڑی واردات، نامعلوم چور رات کی تاریکی میں 35 لاکھ روپے سے زائد مالیت کے 5 جانور لے اُڑے۔
تفصیلات کے مطابق جہلم کی تحصیل دینہ کے نواحی علاقے بوڑاجنگل میں مویشی چوری کی ایک بڑی واردات سامنے آئی ہے، جہاں نامعلوم چور رات کی تاریکی میں ایک ڈیرے سے 35 لاکھ روپے سے زائد مالیت کے پانچ قیمتی جانور چرا کر فرار ہو گئے۔ واردات کے دوران چوروں نے ڈیرے میں داخل ہونے کے لیے رکھوالی پر رکھے گئے کتے کو زہریلا گوشت کھلا کر ہلاک کر دیا، جس کے بعد انہوں نے باآسانی اپنی کارروائی مکمل کی۔
یہ واقعہ گزشتہ رات دینہ کے نواحی علاقے بوڑا جنگل میں کالووال پھاٹک کے قریب پیش آیا، جہاں غلام عباس ولد صالح محمد سکنہ تحصیل پھالیہ ضلع منڈی بہاؤالدین کے ڈیرے کو نشانہ بنایا گیا۔ چور سب سے پہلے ڈیرے کی رکھوالی پر مامور کتے کو زہریلا گوشت کھلا کر ہلاک کرنے میں کامیاب ہوئے، جس کے بعد انہوں نے ڈیرے میں موجود مویشیوں پر ہاتھ صاف کیا۔
چور 35 لاکھ روپے سے زائد مالیت کے مجموعی طور پر پانچ جانور، جن میں تین گائیں اور دو بھینسیں شامل ہیں، چرا کر موقع سے فرار ہو گئے۔ واردات کا علم ڈیرے پر موجود ملازمین کو بعد میں ہوا، جس کے باعث فوری مزاحمت ممکن نہ ہو سکی۔
زہریلا گوشت کھانے سے کتے کی ہلاکت کے بعد بچا ہوا گوشت صبح کے وقت مرغیوں اور کوّوں کے کھانے سے بھی متعدد پرندے ہلاک ہو گئے۔ ڈیرے پر مجموعی طور پر تقریباً 60 جانور موجود تھے، تاہم باقی جانور محفوظ رہے۔
واقعے کی اطلاع ملنے پر پولیس تھانہ دینہ نے نامعلوم چوروں کے خلاف مقدمہ درج کر کے تفتیش اور ملزمان کی تلاش شروع کر دی ہے۔ پولیس کے مطابق واردات کے مختلف پہلوؤں کا جائزہ لیا جا رہا ہے اور امید ہے کہ جلد ہی ملزمان کو گرفتار کر لیا جائے گا۔
