جہلم: اندرون شہر میں چنگ چی رکشوں کے غیر قانونی اسٹینڈ ٹریفک میں خلل اور شہریوں کو آمدورفت میں شدید مشکلات کا سامنا، با اثر سیاسی شخصیات انتظامی کارروائیوں میں رکاوٹ بننے کا باعث ، چنگ چی رکشہ ڈرائیوروں نے شہر کے گلی محلوں، چوک چوراہوں، بازاروں میں غیر قانونی اسٹینڈ قائم کر لئے ہیں۔
جہلم شہر کے اہم چوک چوراہوں سمیت دیگر بازاروں میں جہاں تجاوزات کی بھر مار ہے وہیں غیر قانونی رکشہ اسٹینڈ نے شہر کا حسن لقویٰ زدہ کرکے رکھ دیا ہے، غیر قانونی رکشہ اسٹینڈز ٹریفک کے بہاؤ میں سب سے بڑی رکاوٹ ہیں، جس کیوجہ سے اندرون شہر کی سڑکوں پر آئے روز ٹریفک کا جام رہنا معمول بن چکا ہے جبکہ حادثات کی شرح میں بھی تیزی سے اضافہ ہو رہا ہے۔
مختلف ادوار میں انتظامیہ کی طرف سے اصلاحات کے ساتھ کریک ڈاؤن کے بھی اعلانات کروائے جاتے رہے جو محض اعلانات تک ہی محدود ہو کر رہ گئے۔
شہری تنظیموں نے ایڈوائزر صوبائی محتسب پنجاب جہلم سے مطالبہ کیاہے کہ اندرون شہر میں جگہ جگہ قائم چنگ رکشہ اسٹینڈز کو ختم کروانے کے احکامات جاری کئے جائیں تاکہ شہریوں کو پیش آنے والی مشکلات کا خاتمہ ممکن ہو سکے۔
