پنڈدادنخان: ضلع جہلم کی تحصیل پنڈدادنخان کے نواحی گاؤں للِہ بھروانہ میں ربیع سیزن کے دوران گندم کی کاشت کا باقاعدہ افتتاح کر دیا گیا۔ محکمہ زراعت توسیع کے زیر اہتمام ڈپٹی ڈائریکٹر زراعت توسیع ضلع جہلم ڈاکٹر محمد احمد نے ترقی پسند کاشتکار محمد اسلم کے ڈیرے پر گندم کی کاشت کا افتتاح کیا۔ اس موقع پر محکمہ زراعت کے افسران، مقامی کاشتکاروں، عوامی نمائندگان اور فیلڈ اسٹاف کی بڑی تعداد موجود تھی۔
تقریب میں اسسٹنٹ ڈائریکٹر زراعت توسیع پنڈدادنخان طاہر خان، زراعت آفیسر پنڈدادنخان محمد ثقلین خان سمیت دیگر متعلقہ افسران اور اہلکاروں نے شرکت کی۔ اس موقع پر گندم کی کاشت کے حوالے سے کاشتکاروں کو آگاہی فراہم کی گئی اور فی ایکڑ پیداوار میں اضافے کے لیے جدید زرعی طریقوں اور محکمہ زراعت کی سفارشات پر عمل کرنے کی اہمیت پر زور دیا گیا۔
میڈیا سے گفتگو کرتے ہوئے ڈپٹی ڈائریکٹر زراعت توسیع ضلع جہلم ڈاکٹر محمد احمد نے کہا کہ پنجاب حکومت گندم کی کاشت میں اضافے اور فی ایکڑ پیداوار بڑھانے کے لیے نہایت سنجیدہ ہے۔ اس سال ضلع جہلم کو 2 لاکھ ایکڑ رقبے پر گندم کاشت کرنے کا ہدف دیا گیا ہے، جس کے حصول کے لیے محکمہ زراعت کا عملہ بھرپور محنت کر رہا ہے۔
انہوں نے بتایا کہ محکمہ زراعت کے افسران اور فیلڈ اسٹاف کاشتکاروں سے مسلسل رابطے میں ہیں اور انہیں گندم کی کاشت کی اہمیت، موزوں زرعی طریقوں اور بہتر پیداوار کے لیے ضروری اقدامات سے آگاہ کیا جا رہا ہے۔ اس سلسلے میں فیلڈ عملہ مختلف علاقوں میں جا کر کاشتکاروں کو متحرک کر رہا ہے تاکہ مقررہ ہدف حاصل کرنے کے ساتھ گندم کی فی ایکڑ پیداوار میں بھی اضافہ کیا جا سکے۔
ڈاکٹر محمد احمد نے کاشتکاروں کو یقین دلایا کہ حکومت گندم کی قیمت کے معاملے پر انہیں مایوس نہیں کرے گی۔ انہوں نے کہا کہ گندم ملکی غذائی ضروریات پوری کرنے کے لیے بنیادی اہمیت رکھتی ہے، اس لیے کاشتکاروں کو چاہیے کہ وہ فصل کی بہتر پیداوار کے لیے محکمہ زراعت کی سفارشات پر عمل کریں۔
انہوں نے کاشتکاروں پر زور دیا کہ گندم کی کاشت روایتی طریقوں کے بجائے باقاعدہ قطاروں میں کریں، تصدیق شدہ اور معیاری بیج استعمال کریں اور اپنی کاشت 15 نومبر سے پہلے مکمل کر لیں۔ ان کے مطابق بروقت کاشت اور مناسب زرعی طریقوں کو اپنانے سے فی ایکڑ پیداوار میں ڈیڑھ سے دو من تک اضافہ ممکن ہو سکتا ہے۔
ڈپٹی ڈائریکٹر زراعت توسیع نے مزید کہا کہ کاشتکاروں کی جانب سے بروقت کاشت اور جدید زرعی سفارشات پر عمل درآمد نہ صرف ان کی پیداوار اور آمدن میں اضافے کا ذریعہ بن سکتا ہے بلکہ ملک کی غذائی ضروریات پوری کرنے میں بھی اہم کردار ادا کرے گا۔ انہوں نے اس عزم کا اظہار کیا کہ محکمہ زراعت ضلع جہلم میں گندم کی کاشت کا مقررہ ہدف حاصل کرنے کے لیے اپنی کوششیں جاری رکھے گا۔
