جہلم شہر کی معروف سماجی شخصیت علی راجہ نے عشرہ محرم الحرام اور یوم عاشور کے موقع پر ضلعی سطح پر کیے گئے مثالی انتظامات پر ڈپٹی کمشنر، ڈسٹرکٹ پولیس آفیسر سمیت تمام متعلقہ اداروں اور محکموں کے افسران و ملازمین کو شاندار الفاظ میں خراج تحسین پیش کیا ہے۔
علی راجہ نے کہا کہ محرم الحرام کے دوران جلوسوں اور مجالس کے پُرامن، منظم اور محفوظ انعقاد کے لیے ضلعی انتظامیہ، پولیس، رینجرز، ریسکیو 1122، محکمہ صحت، سول ڈیفنس، میونسپل کمیٹی، راولپنڈی ویسٹ مینجمنٹ کمپنی، محکمہ ریونیو، ضلع کونسل، لوکل گورنمنٹ، سوئی گیس، واپڈا اور دیگر قانون نافذ کرنے والے اداروں نے جس لگن اور فرض شناسی سے اپنے فرائض سر انجام دیے، وہ قابلِ تحسین اور لائقِ ستائش ہیں۔
انہوں نے امن و امان کے قیام کے لیے امن کمیٹی کے ممبران کی خدمات کو بھی سراہا جنہوں نے عاشورہ کے روز ضلع جہلم کے مختلف علاقوں میں جلوسوں کے دورے کیے اور شرکاء میں امن، یگانگت، اتحاد، وحدت اور مذہبی ہم آہنگی کا پیغام عام کر کے پُرامن فضا کے قیام میں کلیدی کردار ادا کیا۔
راجہ علی نے محرم الحرام کی مناسبت سے جہلم پریس کلب سے تعلق رکھنے والے پرنٹ، الیکٹرانک اور سوشل میڈیا کے نمائندگان کی مثبت اور ذمہ دارانہ رپورٹنگ کی بھی تعریف کرتے ہوئے کہا کہ میڈیا نے بغیر کسی تعصب کے عزاداری کے جذبات اور پُرامن پیغامات کو عوام تک مؤثر انداز میں پہنچایا۔
آخر میں انہوں نے اس عزم کا اظہار کیا کہ ایسی ہم آہنگی، تعاون اور نظم و ضبط مستقبل میں بھی برقرار رکھا جائے تاکہ مذہبی مواقع پُرامن اور وقار کے ساتھ منائے جا سکیں۔
