جہلم: کمشنر راولپنڈی ڈویژن سلمان غنی نے ڈپٹی کمشنر جہلم میر رضا اوزگن کے ہمراہ تحصیل ہیڈکوارٹر ہسپتال سوہاوہ اور کارڈیک سنٹر، ڈی ایچ کیو ہسپتال جہلم کا دورہ کیا، جہاں انہوں نے مریضوں کو فراہم کی جانے والی طبی سہولیات، علاج معالجے اور ہسپتال کے مجموعی انتظامات کا تفصیلی جائزہ لیا۔
ٹی ایچ کیو ہسپتال سوہاوہ کے دورے کے دوران کمشنر نے مختلف وارڈز اور شعبہ جات کا معائنہ کیا۔ انہوں نے صفائی ستھرائی، ادویات کی دستیابی، طبی عملے کی حاضری، مریضوں کے علاج معالجے اور دیگر سہولیات کا جائزہ لیا۔
کمشنر سلمان غنی نے زیرِ علاج مریضوں سے ملاقات کرکے ان کی خیریت دریافت کی اور ان سے علاج، ادویات اور ہسپتال میں فراہم کی جانے والی طبی سہولیات کے بارے میں براہِ راست معلومات حاصل کیں۔
بعد ازاں کمشنر راولپنڈی ڈویژن نے کارڈیک سنٹر، ڈی ایچ کیو ہسپتال جہلم کا بھی معائنہ کیا، جہاں انہوں نے دل کے مریضوں کے لیے دستیاب تشخیصی اور علاج معالجے کی سہولیات، طبی آلات اور مجموعی سروس ڈیلیوری کا جائزہ لیا۔ انہوں نے مریضوں اور ان کے لواحقین سے بھی ملاقات کی اور انہیں فراہم کی جانے والی طبی سہولیات کے بارے میں دریافت کیا۔
اس موقع پر طبی عملے نے کمشنر راولپنڈی ڈویژن کو ہسپتال میں دستیاب طبی سہولیات، مریضوں کے علاج، ادویات کی دستیابی اور سروس ڈیلیوری کے حوالے سے تفصیلی بریفنگ دی۔
کمشنر سلمان غنی نے طبی عملے کو ہدایت کی کہ مریضوں کو بروقت اور معیاری علاج معالجہ فراہم کیا جائے، ادویات کی مسلسل دستیابی یقینی بنائی جائے اور ہسپتالوں میں صفائی ستھرائی سمیت تمام ضروری سہولیات کا معیار برقرار رکھا جائے۔
انہوں نے مزید کہا کہ سرکاری ہسپتالوں میں آنے والے مریضوں کو بہتر طبی سہولیات کی فراہمی اور ان کے مسائل کا بروقت ازالہ انتظامیہ کی اولین ترجیحات میں شامل ہے۔
