جہلم: ماہِ رمضان کی آمد کے ساتھ ہی جہلم شہر اور اس کے گردونواح میں بھکاری مافیا کی سرگرمیاں عروج پر پہنچ گئی ہیں، جس سے شہریوں کا جینا دوبھر ہو گیا ہے۔ خواتین پر مشتمل بھیک مافیا کے گینگز پوش علاقوں میں نہ صرف بھیک مانگنے میں مصروف ہیں بلکہ گھروں میں چوری اور دیگر جرائم میں بھی ملوث پائی جاتی ہیں۔
شہر کے مختلف چوک چوراہوں اور اہم سڑکوں پر مرد، خواتین اور کمسن بچوں پر مشتمل گروہ دوسرے صوبوں اور پنجاب کے پسماندہ علاقوں سے آ کر بھیک مانگتے نظر آتے ہیں۔ ان گروہوں کی بڑھتی ہوئی سرگرمیوں سے نہ صرف عام شہری پریشان ہیں بلکہ ٹریفک کی روانی بھی متاثر ہو رہی ہے۔
دوسری جانب محکمہ سوشل ویلفیئر اور قانون نافذ کرنے والے اداروں کی عدم دلچسپی کے باعث یہ بھکاری گروہ مزید بے لگام ہو گئے ہیں اور شہر میں کھلے عام اپنی سرگرمیاں جاری رکھے ہوئے ہیں۔
شہریوں نے ڈسٹرکٹ پولیس آفیسر (ڈی پی او) اور ڈپٹی کمشنر سے فوری نوٹس لینے اور بھکاری مافیا کے خلاف سخت کارروائی عمل میں لانے کا مطالبہ کیا ہے تاکہ عوام کو اس پریشانی سے نجات مل سکے۔
