سوہاوہ: حلقے کی ممتاز سیاسی و سماجی شخصیات نے ممبر قومی اسمبلی چوہدری فرخ الطاف سے ملاقات کرتے ہوئے ان کی سیاسی، سماجی اور عوامی خدمات پر بھرپور اعتماد کا اظہار کیا، جبکہ ایم این اے نے ڈھوک موجو سے گجیال اور تاجہ موری لنک روڈز کی جلد تعمیر کا اعلان کر دیا۔
رپورٹ کے مطابق نمبردار مہر امان اللہ گھنومیرا اور نمبردار محمد صادق گجیال کی قیادت میں معززینِ علاقہ کے ایک وفد نے چوہدری فرخ الطاف سے ملاقات کی۔ وفد میں چوہدری گلستان، چوہدری صفدر، چوہدری عبدالمالک، راجہ محمد بوٹا، چوہدری ارشد، چوہدری عبدالجبار، چوہدری طیب رسول، صوبیدار خالق، چوہدری محمود، چوہدری ذیشان، چوہدری مشتاق حسین، چوہدری منیر حسین، چوہدری لطیف، چوہدری اویس، چوہدری ظفر، چوہدری ندیم، چوہدری اسامہ صادق اور چوہدری عارف سمیت دیگر شخصیات شریک تھیں۔
ملاقات کے دوران وفد نے علاقے کے دیرینہ عوامی مسئلے، ڈھوک موجو سے گجیال اور تاجہ موری لنک روڈ کی خستہ حالی اور ناقص صورتحال سے آگاہ کرتے ہوئے بتایا کہ سڑکوں کی عدم تعمیر کے باعث اہلِ علاقہ کو روزانہ آمدورفت، تعلیمی، کاروباری اور طبی سہولیات کے حصول میں شدید مشکلات کا سامنا کرنا پڑ رہا ہے۔
وفد کی بات سنتے ہوئے ممبر قومی اسمبلی چوہدری فرخ الطاف نے یقین دہانی کرائی کہ دونوں لنک روڈز کا جلد باقاعدہ سروے کرایا جائے گا اور انہیں ترجیحی بنیادوں پر تعمیراتی منصوبے میں شامل کر کے جلد از جلد کام کا آغاز کیا جائے گا تاکہ اہلِ علاقہ کو درپیش مشکلات کا مستقل حل ممکن بنایا جا سکے۔
اس موقع پر معززینِ علاقہ نے چوہدری فرخ الطاف کی عوامی خدمات اور ترقیاتی منصوبوں پر بھرپور اعتماد کا اظہار کرتے ہوئے ان کی مکمل حمایت کا اعلان کیا۔ انہوں نے کہا کہ عوامی مسائل کے حل کے لیے ان کی سنجیدہ کاوشیں قابلِ تحسین ہیں۔
چوہدری فرخ الطاف کے تعمیراتی اعلان پر نمبردار مہر امان اللہ، نمبردار محمد صادق اور دیگر شرکاء نے ان کا شکریہ ادا کیا اور اس امید کا اظہار کیا کہ منصوبہ جلد مکمل ہو کر علاقے کی عوام کے لیے سفری سہولتوں میں نمایاں بہتری کا باعث بنے گا۔
