دینہ پولیس نے بڑی کارروائی کرتے ہوئے مایو ڈکیت گینگ کے 2 کارندے گرفتار کر لئے۔
تفصیلات کے مطابق جہلم کی تحصیل دینہ میں ایس ایچ او سرمد الیاس ملک کی قیادت میں تھانہ دینہ پولیس نے ڈکیت گینگ کے خلاف کارروائیاں کرتے ہوئے مایو ڈکیت گینگ کے 2 کارندوں کو گرفتار کر لیا ہے۔ ملزمان کے قبضے سے دورانِ ڈکیتی چھینی گئی رقم دس لاکھ روپے اور اسلحہ بھی برآمد کیا گیا ہے۔
پولیس کا کہنا ہے کہ گرفتار ملزمان کے خلاف مختلف تھانوں میں ڈکیتی، چوری، راہزنی اور ناجائز اسلحہ کے متعدد مقدمات درج ہیں۔ ملزمان ویران سڑکوں پر ناکہ لگا کر شہریوں سے لوٹ مار کی وارداتیں کرتے تھے۔
پولیس کے مطابق مایو گینگ 4 رکنی ہے اور دوسرے 2 ملزمان کی گرفتاری کے لیے خصوصی ٹیم تشکیل دے دی گئی ہے۔ گرفتار ملزمان کو تھانے منتقل کر کے مزید تفتیش شروع کر دی گئی ہے۔
