جہلم میں ہونے والی معمولی بارش نے میونسپل کمیٹی کی انتظامیہ کی کارکردگی کا پول کھول دیا،سڑکوں پر بارشی پانی کھڑا ہونے سے میونسپل کمیٹی کی انتظامیہ کے لیے پانی کی نکاسی چیلنج بن گئی ،سول لائن روڈ ،سٹی ویگن اسٹینڈ، پولیس لائن روڈ، کمیلا روڈ سمیت اہم سڑکیں زیرآ ب آگئیں۔
تفصیلات کے مطابق جہلم میں بدھ کے روز ہونے والی معمولی بارش سے شہر کی سڑکوں پر پانی جمع ہو گیاجس کی بنیادی وجہ نکاسی آب کے نالوں کی بروقت صفائی ستھرائی اور نالوں پر قائم ہونے والی پختہ تجاوزات کا خاتمہ نہ ہونا ہے۔ بارشی پانی جمع ہونے سے شہریوں کو آمدروفت میں مشکلات کا سامنا کرنا پڑا۔
شہری تنظیموں کے عمائدین نے ڈپٹی کمشنر ، ایڈمنسٹریٹر میونسپل کمیٹی ، چیف آفیسر میونسپل کمیٹی سے مطالبہ کیاہے کہ نکاسی آب کے نالوں پر قائم ہونے والی پختہ تجاوزات اور نالوں کی صفائی ستھرائی کروائی جائے تاکہ شہر کی سڑکوں پر جمع ہونے والے پانی کا خاتمہ ہو اور شہریوں کو پیش آنے والی مشکلات ختم ہو سکیں۔
