جہلم: عیدالفطر کے موقع پر مرغن اور بھاری غذاؤں کے زیادہ استعمال سے بدہضمی، تیزابیت اور دیگر طبی مسائل پیدا ہونے کا خدشہ بڑھ جاتا ہے۔
ان خیالات کا اظہار ڈسٹرکٹ ہیڈکوارٹر اسپتال کے میڈیکل اسپیشلسٹ ڈاکٹر فواد مجید چوہدری نے اخبار نویسوں سے خصوصی گفتگو کرتے ہوئے کیا۔ انہوں نے کہا کہ رمضان المبارک کے دوران انسانی جسم ایک مخصوص غذائی معمول کا عادی ہو جاتا ہے، جس میں کھانے پینے کے اوقات اور مقدار محدود ہوتی ہے۔
انہوں نے کہا کہ عید کے دن اچانک مرغن، چکنائی اور میٹھے سے بھرپور غذاؤں کا زیادہ استعمال معدے پر بوجھ ڈال دیتا ہے، جس کے نتیجے میں بدہضمی، تیزابیت اور معدے کے دیگر مسائل پیدا ہو سکتے ہیں۔
ڈاکٹر فواد مجید چوہدری کے مطابق عید کے موقع پر مٹھائیوں، کولڈ ڈرنکس اور چکنائی سے بھرپور اشیاء کا زیادہ استعمال صحت کے لیے نقصان دہ ثابت ہو سکتا ہے۔ انہوں نے شہریوں کو مشورہ دیا کہ وہ اعتدال کے ساتھ کھانے پینے کو ترجیح دیں، زیادہ پانی پئیں اور ہلکی و متوازن غذا استعمال کریں تاکہ صحت کے مسائل سے بچا جا سکے۔
انہوں نے خبردار کیا کہ دل کے امراض، ذیابیطس، ہائی بلڈ پریشر اور جوڑوں کے درد میں مبتلا افراد کو خصوصی احتیاط برتنی چاہیے کیونکہ غیر متوازن غذا ان بیماریوں میں اضافہ اور پیچیدگیوں کا باعث بن سکتی ہے۔
میڈیکل اسپیشلسٹ نے حاملہ خواتین کو بھی ہدایت کی کہ وہ اپنی غذا کے معاملے میں خصوصی احتیاط کریں اور متوازن خوراک کو ترجیح دیں کیونکہ زیادہ میٹھا اور مرغن غذاؤں کا استعمال ماں اور بچے دونوں کی صحت پر منفی اثرات مرتب کر سکتا ہے۔
انہوں نے مزید کہا کہ عید کی خوشیوں سے بھرپور انداز میں لطف اندوز ہونے کے لیے ضروری ہے کہ شہری اپنی صحت کا خیال رکھیں اور کھانے پینے میں اعتدال اختیار کریں تاکہ عید کی خوشیاں کسی بھی طبی مسئلے کی وجہ سے ماند نہ پڑیں۔
