پڑی درویزہ/ سوہاوہ: پاکستان پیپلز پارٹی (پی پی پی) تحصیل سوہاوہ کے دفتر میں سابق وزیر اعظم پاکستان محترمہ بے نظیر بھٹو شہید کی 17 ویں برسی کے موقع پر ایک دعائیہ تقریب کا انعقاد کیا گیا۔
یہ تقریب لیاقت باغ راولپنڈی جانے سے پہلے منعقد کی گئی جس میں شرکاء نے محترمہ بے نظیر بھٹو کی جمہوری جدوجہد کو شاندار انداز میں خراج عقیدت پیش کیا۔ تقریب کا اہتمام پی پی پی سیکریٹری تحصیل سوہاوہ شوکت علی مغل نے کیا، جن کا مرکزی کردار تھا۔
دعائیہ تقریب میں تحصیل سوہاوہ کے کارکنان اور عہدیداران نے اظہار خیال کرتے ہوئے کہا کہ محترمہ بے نظیر بھٹو عالم اسلام کی پہلی خاتون وزیر اعظم منتخب ہونے والی شخصیت تھیں۔ شرکاء نے محترمہ شہید کے ویژن پر روشنی ڈالی اور ان کے مشن کی تکمیل تک جدوجہد جاری رکھنے کے عزم کا اظہار کیا۔
انہوں نے کہا کہ محترمہ بے نظیر بھٹو کی قربانیوں اور جمہوریت کی بقا کے لیے ان کی جنگ ہمیشہ یاد رکھی جائے گی۔
اس موقع پر پاکستان پیپلز پارٹی ضلع جہلم کے صدر چوہدری تسنیم ناصر کی قیادت میں ایک بڑا قافلہ سوہاوہ پہنچا، جو دعائیہ تقریب میں شریک ہوا۔ تقریب کے بعد پی پی پی ضلع جہلم کے جنرل سیکریٹری مرزا عبدالغفار کے بیٹے ہمایوں تیمور کی قیادت میں سوہاوہ سے ایک اور قافلہ راولپنڈی کی جانب روانہ ہو گیا۔
آخر میں محترمہ بے نظیر بھٹو شہید کے ایصال ثواب کے لیے اجتماعی دعا کی گئی۔
