دینہ: اسسٹنٹ کمشنر دینہ تیمور خان اور پیرا فورس کے انچارج ظہیر عباس نے رات گئے کارروائی کرتے ہوئے سمارٹ لاک ڈاؤن کی خلاف ورزی کرنے والے دکانداروں اور ہوٹل مالکان کے خلاف سخت ایکشن لیا، جس کے نتیجے میں متعدد دکانیں اور ہوٹلز سیل کر دیے گئے جبکہ کئی افراد کو بھاری جرمانے بھی عائد کیے گئے۔
رپورٹ کے مطابق انتظامیہ نے مختلف علاقوں میں اچانک چیکنگ کے دوران مقررہ اوقات کی خلاف ورزی کرنے والے کاروباری مراکز کو نشانہ بنایا۔ کارروائی کے دوران متعدد دکانداروں اور ہوٹل مالکان کو وارننگ کے ساتھ جرمانے کیے گئے جبکہ مسلسل خلاف ورزی کرنے والوں کی دکانیں سیل کر دی گئیں۔
اسسٹنٹ کمشنر تیمور خان کا کہنا تھا کہ حکومتی احکامات پر عملدرآمد ہر صورت یقینی بنایا جائے گا اور وقت کی پابندی نہ کرنے والوں کے خلاف بلا امتیاز کارروائی جاری رہے گی۔
انہوں نے واضح کیا کہ دکاندار اور ہوٹل مالکان مقررہ اوقات کی پابندی کریں، بصورت دیگر سخت قانونی کارروائی عمل میں لائی جائے گی اور کسی بھی خلاف ورزی پر کوئی رعایت نہیں دی جائے گی۔
