جہلم میں پیر خانہ روڈ پر نامعلوم افراد نے فائرنگ کر کے 43 سالہ شخص کو قتل کر دیا۔
تفصیلات کے مطابق جہلم میں تھانہ صدر کے علاقے پیر خانہ روڈ پر نامعلوم افراد نے فائرنگ کر کے 43 سالہ بشارت کو قتل کر دیا۔ ذرائع کے مطابق مقتول کو گھات لگا کر نشانہ بنایا گیا اور حملہ آور واردات کے بعد گاڑی میں فرار ہونے میں کامیاب ہو گئے۔
ابتدائی معلومات کے مطابق نامعلوم شخص نے مقتول کو فون کال کر کے گھر سے باہر بلایا، جیسے ہی وہ گھر سے باہر آیا تو پہلے سے موجود ملزمان نے اس پر اندھا دھند فائرنگ کر دی۔ 43 سالہ بشارت شدید زخمی ہونے کے باعث موقع پر ہی جاں بحق ہو گیا۔
لواحقین نے بتایا کہ مقتول کی کسی سے کوئی دشمنی نہیں تھی اور گھر میں کہرام مچا ہوا ہے۔ واقعہ کی اطلاع ملتے ہی پولیس کی بھاری نفری اور فرانزک ٹیم موقع پر پہنچ گئی، جس نے شواہد اکٹھے کرنے کا عمل شروع کر دیا ہے۔
پولیس حکام کا کہنا ہے کہ واقعہ کی ہر پہلو سے تحقیقات جاری ہیں اور جلد ہی ملزمان کو گرفتار کر لیا جائے گا۔
