جہلم: تھانہ چوٹالہ پولیس کی شاندار کارروائیاں، ڈکیتی اور چوری کی وارداتوں میں ملوث دو خطرناک ڈکیت گینگ کے چھ ملزمان گرفتار کر لئے۔ پولیس نے مال مسروقہ، موٹر سائیکلز اور ناجائز اسلحہ برآمد کر لیا۔
تفصیلات کے مطابق جہلم میں ایس ایچ او تھانہ چوٹالہ اور ان کی ٹیم نے کارروائی کرتے ہوئے سلطانہ ڈکیت گینگ کے تین ملزمان سلطان حسین، آصف نعیم اور مظہر حسین کو گرفتار کر لیا۔
ملزمان کے قبضے سے چھینے گئے موبائل فونز جن کی مالیت 4 لاکھ 45 ہزار روپے، نقدی 9 ہزار 500 روپے اور وارداتوں میں استعمال ہونے والا موٹر سائیکل برآمد کر لیا گیا۔ مزید برآں ملزم مظہر حسین کے قبضے سے 30 بور کا ناجائز پسٹل بمعہ ایمونیشن بھی برآمد ہوا۔
تھانہ چوٹالہ پولیس نے چوری اور موٹر سائیکل چوری کی وارداتوں میں ملوث پیرو گینگ کے تین ملزمان مسعود الحسن عرف پیرو، غلام فرید اور عبداللہ کو گرفتار کر لیا۔ ملزمان کے قبضے سے چوری شدہ دو موٹر سائیکل، پیٹر انجن، شافٹ، الیکٹرک آری (مالیت 1 لاکھ 50 ہزار روپے) اور 48 عدد کبوتر (مالیتی 50 ہزار روپے) برآمد کر لیے گئے۔
پولیس کے مطابق ملزمان کو ٹھوس شواہد کے ساتھ عدالت میں چالان کیا جائے گا تاکہ انہیں قرار واقعی سزا دلائی جا سکے۔
ڈسٹرکٹ پولیس آفیسر جہلم طارق عزیز سندھو نے کامیاب کارروائیوں پر پولیس ٹیم کو شاباش دیتے ہوئے کہا کہ جرائم پیشہ عناصر کسی رعایت کے مستحق نہیں۔ شہریوں کی جان و مال کا تحفظ پولیس کی اولین ترجیح ہے اور اس مشن کو ہر حال میں یقینی بنایا جائے گا۔
