جہلم میں سی سی ڈی اور ڈاکوؤں کے درمیان مبینہ مقابلے میں ایک خطرناک ملزم زخمی حالت میں گرفتار کر لیا گیا۔
ترجمان سی سی ڈی جہلم کے مطابق کرائم کنٹرول ڈیپارٹمنٹ کی ٹیم جہلم پر دورانِ ناکہ بندی ڈاکوؤں نے فائرنگ کر دی تاہم ٹیم خوش قسمتی سے محفوظ رہی۔ واقعہ تھانہ صدر جہلم کی حدود میں نوگراں روڈ پر کوڑا فیکٹری کے قریب پیش آیا۔
ترجمان کے مطابق گزشتہ شب سی سی ڈی ٹیم نے علاقے میں ڈکیتی کی بڑھتی ہوئی وارداتوں کے پیش نظر ناکہ بندی کر رکھی تھی کہ اس دوران ایک موٹر سائیکل پر سوار دو افراد کو مشکوک جان کر رکنے کا اشارہ کیا گیا لیکن ملزمان نے رکنے کے بجائے اندھا دھند فائرنگ شروع کر دی اور فرار ہونے لگے۔
فائرنگ سے سی سی ڈی ٹیم محفوظ رہی، سی سی ڈی ٹیم کی جانب سے ملزمان کا تعاقب کیا گیا تو تھوڑی ہی دیر بعد ایک ملزم زخمی حالت میں ملا جس کی شناخت وسیم امبر عرف چھنو ولد عبدالواحد سکنہ بہرام پور تحصیل دینہ ضلع جہلم کے نام سے ہوئی۔
زخمی ملزم کو طبی امداد کے لیے ڈی ایچ کیو اسپتال جہلم منتقل کر دیا گیا جبکہ اس کا ساتھی اندھیرے کا فائدہ اٹھا کر فرار ہونے میں کامیاب ہو گیا۔ پولیس نے فرار ملزم کی تلاش کے لیے سرچ آپریشن شروع کر دیا ہے۔
ترجمان کرائم کنٹرول ڈیپارٹمنٹ جہلم کے مطابق زخمی ملزم کے قبضے سے ناجائز اسلحہ، ڈکیتی کی وارداتوں میں چھینے گئے اے ٹی ایم کارڈز اور تھانہ مندرہ ضلع راولپنڈی کے علاقے سے چھینا گیا ایک موٹر سائیکل بھی برآمد ہوا ہے۔
ذرائع کا کہنا ہے کہ گرفتار ملزم ایک فعال بین الاضلاعی ڈکیت گینگ کا سرکردہ رکن ہے جو ڈکیتی، راہزنی، چوری، موٹر سائیکل چوری اور غیر قانونی اسلحہ رکھنے جیسے 30 سے زائد مقدمات میں ریکارڈ یافتہ ہے۔ ملزم جہلم کے علاوہ ضلع راولپنڈی کی متعدد ڈکیتی کی وارداتوں میں بھی مطلوب تھا۔ ملزم سے مزید اہم انکشافات متوقع ہیں۔
