جہلم: لاہور ہائیکورٹ نے جہلم سمیت پنجاب بھر میں پرندوں کی خریدوفروخت کیلئے لائسنس کے اجرا کا حکم جاری کردیا۔
لاہور ہائیکورٹ کے جسٹس شاہد کریم نے سموگ کے تدارک کے حوالے سے دائر درخواستوں پر سماعت کی۔ دوران سماعت سرکاری وکیل نے عدالت کو بتایا کہ ٹوئنٹل مارکیٹ میں پولٹری کا کاروبار ہوتا ہے، یہ پولٹری کے کاروبار کے لیے بنائی گئی تھی، جس پر درخواست گزار کے وکیل نے عدالت کو آگاہ کیا کہ اس وقت وہاں پر پرندوں کی خرید وفروخت ہوتی ہے۔
جسٹس شاہد کریم نے کہا کہ یہ معاملہ محکمہ وائلڈ لائف کو دیکھنا چاہئے۔عدالت نے حکم دیا کہ پرندوں کی خرید و فروخت کے لیے پنجاب بھر میں لائسنس کا اجرا کیا جائے، پورے پنجاب کی حدود میں بغیر لائسنس پرندوں کی فروخت پر پابندی عائد کی جائے۔
عدالت نے کہا کہ نہروں کی صفائی کے بعد مٹی ہرطرف پھیل چکی ہے، محکمہ انہار اس پر کچھ نہیں کر رہا، ممبر جوڈیشل واٹر کمیشن نے تجویز دی کہ سکولوں کالجوں میں ایک پیریڈ شجرکاری کی مہم کے لیے بھی رکھا جائے۔
بعدازاں لاہور ہائی کورٹ نے تدارک سموگ سے متعلق دائر درخواستوں پر مزید سماعت آئندہ جمعہ تک ملتوی کر دی۔
