جہلم: ڈاکٹر فضل الحق نے کہا ہے کہ پاک فوج ایک جانب ملک کی سرحدوں کی حفاظت کے عظیم فریضے کی انجام دہی کر رہی ہے جبکہ دوسری جانب ملک کے اندر مشکلات اور قدرتی آفات سے متاثرہ عوام کو ریلیف فراہم کرنے میں بھی بھرپور کردار ادا کر رہی ہے۔ پاک فوج کا کردار نہایت اہم اور قابلِ فخر ہے اور پوری قوم کو اپنی مسلح افواج پر ناز ہے۔
ممبر قومی اسمبلی چوہدری فرخ الطاف کے پرسنل سیکرٹری ڈاکٹر فضل الحق فضلی نے اخبار نویسوں سے ملاقات کے دوران گفتگو کرتے ہوئے کہا کہ گزشتہ ہفتے برفباری سے متاثرہ برزل پاس میں کلیئرنس آپریشن کے دوران سنو سلائیڈنگ کے نتیجے میں جامِ شہادت پانے والے پاک فوج کے کیپٹن احمد، سپاہی رضوان اور سویلین مشین آپریٹر عیسیٰ کو خراجِ عقیدت پیش کرتے ہیں۔
انہوں نے کہا کہ شہداء نے جان کی پرواہ کیے بغیر برفباری سے بند راستوں کو کھولنے اور آمد و رفت بحال رکھنے کے لیے اپنی خدمات جاری رکھیں اور فرض کی ادائیگی کے دوران اپنی جانیں وطن پر نچھاور کر دیں۔
ڈاکٹر فضل الحق نے شہداء کی فیملیز کو بھی سلام پیش کرتے ہوئے کہا کہ یہ خاندان حقیقی معنوں میں قوم کے معزز اور بہادر ترین خاندان ہیں، جن کے سپوت وطنِ عزیز پر قربان ہو کر ہمیشہ کے لیے امر ہو گئے۔ انہوں نے کہا کہ شہداء کی قربانیاں قوم کا مشترکہ سرمایہ ہیں اور پوری قوم ان کی بہادری کو سلامِ عقیدت پیش کرتی ہے۔
