جہلم پولیس نے قماربازی کے خلاف بڑی کارروائی کرتے ہوئے 9 ملزمان کو گرفتار کرلیا۔
تھانہ سول لائنز کے ایس ایچ او اور ان کی ٹیم نے کامیاب کارروائی کرتے ہوئے چوہدری ارشد، عبدالکریم، محمود احمد، محمد اصغر، منظور حسین، یاسر محمود، محمد اسلم، اظہر حسین اور محمد انور کو گرفتار کیا۔
پولیس کے مطابق ملزمان بٹیروں کی لڑائی پر جواء کھیل رہے تھے۔ کارروائی کے دوران ملزمان سے داؤ پر لگی رقم 50 ہزار 140 روپے، 9 عدد موبائل فونز اور 6 عدد بٹیرے برآمد کیے گئے۔ ملزمان کے خلاف انسدادِ قماربازی ایکٹ کے تحت مقدمہ درج کر لیا گیا ہے۔
ڈی پی او جہلم طارق عزیز سندھو نے کارروائی کو سراہتے ہوئے کہا ہے کہ قماربازی معاشرتی برائیوں اور جرائم کی جڑ ہے، اور اس لعنت کے خاتمے کے لیے پولیس بھرپور اقدامات جاری رکھے گی۔
انہوں نے شہریوں سے بھی اپیل کی کہ وہ ایسے جرائم کی اطلاع فوری طور پر متعلقہ تھانوں کو دیں تاکہ سماجی بگاڑ کا مؤثر سدباب کیا جا سکے۔
