جہلم: سسرال والوں کے تشدد کی وجہ سے گھر چھوڑنے والی خاتون کو فروخت کرنے کی غرض سے اغوا کرلیا گیا، جسے بازیاب کروا کر جہلم پولیس نے ملزمان کو گرفتار کرلیا۔
تفصیلات کے مطابق لاہور کی رہائشی ایک خاتون کو جہلم سے بازیاب کروا لیا گیا، جسے ایک منظم جسم فروش گروہ نے فروخت کرنے کی نیت سے اغوا کر رکھا تھا۔
متاثرہ خاتون اپنے سسرال کے تشدد سے دلبرداشتہ ہو کر گھر چھوڑ کر چلی گئی تھی۔ اس موقع کا فائدہ اٹھاتے ہوئے ملزمان نے اسے تحفظ دینے کا جھانسہ دیا اور بعد ازاں بیچنے کی غرض سے اغوا کر لیا۔ تاہم خاتون کو موقع ملتے ہی اس نے 15 ایمرجنسی ہیلپ لائن پر کال کر کے مدد طلب کی۔
ورچوئل ویمن پولیس اسٹیشن نے فوری کارروائی کرتے ہوئے جہلم پولیس کو اطلاع دی۔ اگرچہ خاتون کا نمبر مسلسل بند تھا، تاہم کیس کی پیروی جاری رکھی گئی اور سیف سٹی کی مدد سے لوکیشن ٹریسنگ کے ذریعے جہلم پولیس کو موقع پر بھیجا گیا۔
تحقیقات میں انکشاف ہوا کہ یہ ایک منظم گروہ تھا، جو خواتین کو اغوا کرکے فروخت کرتا تھا۔ ورچوئل ویمن پولیس اسٹیشن اور جہلم پولیس کی بروقت کارروائی کے نتیجے میں اغواکاروں کو گرفتار کر لیا گیا اور مغوی خاتون کو بحفاظت بازیاب کروا لیا گیا۔
ترجمان سیف سٹی کے مطابق ظلم و زیادتی کا شکار خواتین کسی بھی ایمرجنسی کی صورت میں 15 پر کال کرکے 2 دباکر ورچوئل ویمن پولیس اسٹیشن سے فوری مدد حاصل کر سکتی ہیں۔
