جہلم: ڈپٹی کمشنر جہلم میر رضا اوزگن کی ہدایت پر ایڈمنسٹریٹر میونسپل کمیٹی نے تحصیل روڈ کا دورہ کیا اور بازار کو ماڈل بنانے کے جاری منصوبے کا تفصیلی جائزہ لیا۔
دورے کے دوران ایڈمنسٹریٹر نے کنٹریکٹر کو ہدایت کی کہ منصوبے کی پائیداری کو یقینی بنانے کے لیے ہر مرحلے پر اعلیٰ معیار کا میٹریل استعمال کیا جائے۔ انہوں نے اس بات پر بھی زور دیا کہ تعمیراتی کام کے دوران بازار کی ظاہری خوبصورتی اور نفاست کا خاص خیال رکھا جائے تاکہ یہ جگہ شہریوں کے لیے مزید پرکشش بن سکے۔
ایڈمنسٹریٹر نے منصوبے کی رفتار تیز کرنے کی ہدایت دیتے ہوئے کہا کہ کام جلد مکمل کیا جائے تاکہ تاجر اور خریدار جدید اور خوبصورت انفراسٹرکچر سے جلد مستفید ہو سکیں۔
ضلعی انتظامیہ کے مطابق تحصیل روڈ بازار کو ماڈل بنانے سے نہ صرف تجاوزات کا خاتمہ ممکن ہوگا بلکہ شہر کی مجموعی خوبصورتی اور وقار میں بھی اضافہ ہوگا۔
انہوں نے واضح کیا کہ ضلعی انتظامیہ شفافیت اور اعلیٰ تعمیراتی معیار کو یقینی بنانے کے لیے پرعزم ہے اور اس منصوبے میں کسی قسم کی غفلت یا کوتاہی برداشت نہیں کی جائے گی۔
