جہلم: پولیس نے جسم فروشی کے مکروہ اور غیر اخلاقی دھندے کے خلاف اہم کارروائی کرتے ہوئے دو خواتین اور ایک دلال کو گرفتار کر لیا۔
تفصیلات کے مطابق جہلم میں پولیس کو اطلاع موصول ہوئی تھی کہ شہر کے ایک علاقے میں جسم فروشی کا غیر قانونی دھندا جاری ہے، جس پر ایس ایچ او تھانہ سٹی اور ان کی ٹیم نے فوری کارروائی کرتے ہوئے چھاپہ مارا اور دو خواتین کو دلال کے ہمراہ گرفتار کر لیا۔
پولیس کے مطابق گرفتار ملزمان نوجوانوں کو اس مکروہ کاروبار میں پھنسانے اور غیر اخلاقی سرگرمیوں میں ملوث تھے۔ ملزمان کے خلاف تھانہ سٹی میں مقدمہ درج کر لیا گیا۔
پولیس حکام کا کہنا ہے کہ ملزمان کے خلاف ٹھوس شواہد اکٹھے کر لیے گئے ہیں اور مزید تفتیش کا عمل جاری ہے جبکہ نیٹ ورک سے منسلک دیگر افراد تک پہنچنے کے لیے بھی تحقیقات کو وسعت دی جا رہی ہے۔
اس حوالے سے ڈسٹرکٹ پولیس آفیسر جہلم طارق عزیز سندھو نے کہا کہ جسم فروشی ایک گھناؤنا اور قابلِ مذمت جرم ہے، جو نوجوان نسل کو اخلاقی پستی کی طرف دھکیلتا ہے۔ ایسے جرائم میں ملوث عناصر کے خلاف کسی قسم کی رعایت نہیں برتی جائے گی۔
ڈی پی او جہلم نے مزید واضح کیا کہ جرائم پیشہ عناصر کے خلاف کارروائیوں کا سلسلہ مستقبل میں بھی پوری شدت کے ساتھ جاری رکھا جائے گا، تاکہ معاشرے کو غیر اخلاقی سرگرمیوں سے پاک کیا جا سکے اور عوام کو محفوظ ماحول فراہم کیا جا سکے۔
