جہلم: ضلع جہلم میں نئے تعینات ہونے والے ایس پی انویسٹیگیشن محمد سکندر گوندل نے باضابطہ طور پر اپنے عہدے کا چارج سنبھال لیا۔
چارج سنبھالنے کے موقع پر پولیس افسران کی جانب سے ان کا پرتپاک استقبال کیا گیا۔
اس موقع پر ایس پی انویسٹیگیشن محمد سکندر گوندل نے اپنے عزم کا اظہار کرتے ہوئے کہا کہ ضلع جہلم میں انویسٹیگیشن کے نظام کو مزید مؤثر، شفاف اور مکمل طور پر میرٹ پر استوار کیا جائے گا۔ انہوں نے واضح کیا کہ زیرِ التواء مقدمات کو بروقت یکسو کرنا اور سائلین کو فوری اور منصفانہ انصاف کی فراہمی ان کی اولین ترجیح ہوگی۔
ایس پی انویسٹیگیشن نے افسران اور تفتیشی عملے کو ہدایت کی کہ وہ پیشہ ورانہ صلاحیتوں، دیانت داری اور قانون کے تقاضوں کے مطابق اپنے فرائض سرانجام دیں تاکہ عوام کا پولیس پر اعتماد مزید مضبوط ہو سکے۔
اس موقع پر ڈسٹرکٹ پولیس آفیسر جہلم طارق عزیز سندھو نے کہا کہ انویسٹیگیشن پولیسنگ کا ایک اہم ستون ہے اور اس شعبے میں بہتری سے انصاف کی فراہمی میں نمایاں بہتری آئے گی۔ انہوں نے امید ظاہر کی کہ محمد سکندر گوندل کی قیادت میں تفتیشی نظام مزید فعال اور عوام دوست ہوگا۔
