جہلم: ڈپٹی کمشنر جہلم سید محمد میثم عباس نے میجر اکرم شہید نشانِ حیدر پارک اور شاندار چوک میں جاری سیوریج سسٹم کے تعمیراتی کاموں کا دورہ کیا۔
اس موقع پر متعلقہ کمپنی کے نمائندگان اور افسران نے انہیں منصوبے کی پیش رفت سے متعلق تفصیلی بریفنگ دی۔
ڈی سی جہلم نے اکرم شہید پارک کے ترقیاتی کاموں کا جائزہ لیتے ہوئے اطمینان کا اظہار کیا اور کہا کہ پارک کو جدید سہولیات سے آراستہ کرنے کا عمل تیزی سے جاری ہے۔
انہوں نے کہا کہ یہ پارک شہریوں کے لیے نہ صرف ایک تفریحی مقام ہو گا بلکہ نوجوانوں کو کھیلوں کی سہولتیں بھی فراہم کرے گا۔
میثم عباس نے شاندار چوک میں سیوریج سسٹم کی تعمیر پر زور دیتے ہوئے ہدایت دی کہ یہ کام جلد از جلد مکمل کیا جائے تاکہ عوام کو نکاسی آب کے مسائل سے نجات مل سکے۔
ڈی سی جہلم نے مزید کہا کہ عوامی منصوبوں کی بروقت تکمیل ضلعی انتظامیہ کی اولین ترجیح ہے اور تمام محکموں کو اس حوالے سے اپنی ذمہ داریاں احسن طریقے سے ادا کرنی چاہئیں۔
