جہلم: وزیراعلیٰ پنجاب کی ہدایت پر عیدالاضحیٰ کے موقع پر صوبے بھر کی جیلوں میں قیدیوں اور حوالاتیوں کو ان کے عزیز و اقارب سے ملاقات کی خصوصی اجازت دی گئی ہے۔ اس سلسلے میں ڈسٹرکٹ جیل جہلم میں بھی قیدیوں کی ملاقاتوں کا باقاعدہ شیڈول جاری کر دیا گیا ہے۔
سپرنٹنڈنٹ جیل ڈسٹرکٹ جیل جہلم کی جانب سے جاری نوٹس کے مطابق عید کے پہلے اور دوسرے دن تمام قیدیوں، حوالاتیوں، خواتین اور نوعمر اسیران کو صبح 9:00 بجے سے شام 5:00 بجے تک ملاقات کی اجازت ہوگی۔
تاہم ملاقات صرف قیدیوں کے قریبی رشتہ داروں یعنی والدین، بھائی، بہن، بیٹا، بیٹی اور بیوی کے ساتھ ہی ممکن ہو سکے گی۔ کسی بھی دوسرے رشتہ دار یا فرد کو ملاقات کی اجازت نہیں دی جائے گی۔
جیل حکام کا کہنا ہے کہ یہ اقدام قیدیوں کی خوشیوں میں شمولیت اور ان کے اہلِ خانہ کے ساتھ روابط کو بہتر بنانے کے لیے کیا گیا ہے۔ ملاقات کے دوران سیکیورٹی اور نظم و ضبط کا مکمل خیال رکھا جائے گا۔
واضح رہے کہ اس حوالے سے تمام تر انتظامات مکمل کر لیے گئے ہیں اور جیل انتظامیہ نے ملاقات کے دوران کسی بھی قسم کی بد نظمی سے نمٹنے کے لیے سیکیورٹی پلان بھی ترتیب دے دیا ہے۔
