جہلم پولیس نے ماہِ ستمبر 2025 کے دوران شاندار کارکردگی کا مظاہرہ کرتے ہوئے جرائم پیشہ عناصر کے خلاف بھرپور کارروائیاں کیں اور 12 گینگ سمیت سینکڑوں ملزمان کو گرفتار کر کے کل 1 کروڑ 11 لاکھ 80 ہزار 900 روپے کا مالِ مسروقہ برآمد کر لیا۔
ڈسٹرکٹ پولیس آفیسر جہلم طارق عزیز سندھو کی ہدایت پر ضلع بھر میں پولیس اہلکاروں نے دن رات مصروف عمل رہتے ہوئے امن و امان کی فضا کو یقینی بنایا اور مختلف وارداتوں میں ملوث ملزمان کو گرفتار کر کے بھاری مالِ مسروقہ اور اسلحہ برآمد کیا۔
جہلم پولیس نے گزشتہ ماہ کے دوران کل 49 مجرمان اشتہاری گرفتار کیے، جن میں 4 اے کیٹگری، 27 بی کیٹگری اور 18 عدالتی مفرور شامل تھے۔ قتل کے 2 مقدمات درج کر کے 4 ملزمان کو گرفتار کیا گیا جبکہ ریپ اور گینگ ریپ کے 5 مقدمات میں 10 ملزمان گرفتار ہوئے۔ بچوں سے زیادتی کے ایک مقدمے میں بھی پولیس نے بروقت کارروائی کرتے ہوئے ملزم کو گرفتار کر لیا۔
گینگز کی سرکوبی کے دوران پولیس نے 12 جرائم پیشہ گروہوں کو ٹریس کیا اور 50 مقدمات میں 32 ملزمان کو گرفتار کر کے ایک کروڑ 11 لاکھ 80 ہزار 900 روپے مالیت کا مسروقہ سامان، 4 تولے سونا، ایک کار، 8 موٹر سائیکلز، 3 موبائل فونز اور 3 عدد پستول معہ 9 روند برآمد کیے۔
منشیات کے خلاف کریک ڈاؤن میں بھی نمایاں کامیابیاں حاصل ہوئیں۔ پولیس نے 53 مقدمات درج کر کے 54 ملزمان کو گرفتار کیا جن کے قبضہ سے 27 کلو 667 گرام چرس، 7 کلو 940 گرام ہیروئن، 3 کلو 770 گرام آئس اور 1594 لیٹر شراب برآمد کی گئی۔ اسی طرح غیر قانونی اسلحہ رکھنے والوں کے خلاف بھی کارروائی کی گئی اور 36 مقدمات درج کرتے ہوئے 38 ملزمان کو گرفتار کیا گیا۔ ملزمان کے قبضہ سے 28 پستول، ایک کلاشنکوف، 3 گنز، 5 رائفلز اور 217 روند برآمد ہوئے۔
قمار بازی کے خلاف کارروائی میں 4 مقدمات درج کرتے ہوئے 33 ملزمان کو گرفتار کیا گیا، جن کے قبضہ سے ایک لاکھ 11 ہزار 65 روپے نقدی، 29 موبائل فونز، 3 موٹر سائیکلز اور غیر ملکی کرنسیاں جن میں ایک پونڈ، 200 ترک لیرا، 21 سعودی ریال اور 2 چائنی ین شامل تھے، برآمد کی گئیں۔
بھکاریوں کے خلاف بھی کریک ڈاؤن کیا گیا اور 45 مقدمات درج کرتے ہوئے 46 بھکاریوں کو گرفتار کیا گیا جن میں 24 مرد اور 22 خواتین شامل تھیں۔
ٹریفک پولیس کی جانب سے بھی خلاف ورزیوں پر سخت کارروائیاں کی گئیں۔ ماہِ ستمبر کے دوران 7493 چالان کیے گئے اور خلاف ورزی کرنے والوں سے مجموعی طور پر 39 لاکھ 69 ہزار 800 روپے جرمانہ وصول کیا گیا۔ پولیس خدمت مراکز سے 4391 شہریوں نے سہولیات حاصل کیں، جبکہ ڈسٹرکٹ پولیس آفیسر نے بذریعہ کمپلینٹ سیل 325 شہریوں کی شکایات سن کر ان کے حل کے لیے احکامات جاری کیے۔
ڈسٹرکٹ پولیس آفیسر جہلم طارق عزیز سندھو نے اس موقع پر کہا کہ پولیس جرائم پیشہ عناصر کے خلاف بلاتفریق کارروائیاں جاری رکھے گی۔ انہوں نے مزید کہا کہ عوام کے جان و مال کی حفاظت، منشیات کے خاتمے اور معاشرتی امن قائم رکھنا جہلم پولیس کی اولین ترجیح ہے۔
