دینہ: ستھرا پنجاب پروگرام کے تحت صفائی کے شعبے میں خدمات سرانجام دینے والے عملے کی حوصلہ افزائی کے لیے اسسٹنٹ کمشنر دینہ ساجدہ رزاق نے ستھرا پنجاب ٹیم کے اراکین میں فی کس 10 ہزار روپے اعزازیہ کے چیکس تقسیم کیے۔
اس موقع پر اسسٹنٹ کمشنر دینہ ساجدہ رزاق نے صفائی کے نظام کو مؤثر اور بہتر رکھنے کے لیے فیلڈ عملے کی محنت، ذمہ داری اور خدمات کو سراہا۔ انہوں نے کہا کہ صفائی کے شعبے میں کام کرنے والا فیلڈ عملہ شہریوں کو صاف ستھرا ماحول فراہم کرنے میں اہم کردار ادا کر رہا ہے۔
اسسٹنٹ کمشنر نے کہا کہ وزیرِ اعلیٰ پنجاب کے وژن کے مطابق شہروں اور دیہی علاقوں میں صفائی کے معیار کو برقرار رکھنے کے لیے فیلڈ ٹیموں کی کارکردگی بنیادی اہمیت رکھتی ہے۔ انہوں نے ستھرا پنجاب ٹیم کے اراکین کو ہدایت کی کہ صفائی ستھرائی، کوڑا کرکٹ کی بروقت جمع آوری و تلفی اور عوامی مقامات کو صاف رکھنے کے لیے اپنی ذمہ داریاں مزید مستعدی اور پیشہ ورانہ انداز میں جاری رکھیں۔
ساجدہ رزاق نے ستھرا پنجاب پروگرام کے تحت جاری صفائی کی سرگرمیوں میں مزید بہتری، موثر فیلڈ نگرانی اور مختلف ٹیموں کے درمیان بہتر رابطہ برقرار رکھنے پر بھی زور دیا۔ انہوں نے کہا کہ اچھی کارکردگی کا اعتراف اور عملے کی حوصلہ افزائی سے ان میں مزید جذبہ پیدا ہوتا ہے، اس لیے شہریوں کو صاف ستھرا اور صحت مند ماحول فراہم کرنے کے لیے اسی محنت، لگن اور ذمہ داری کے ساتھ کام جاری رکھا جائے۔
انہوں نے مزید کہا کہ صفائی کے نظام کو موثر بنانے کے لیے فیلڈ میں موجود عملے کی مسلسل محنت ضروری ہے اور عوامی سہولت کے پیش نظر صفائی کے معیار کو برقرار رکھنے کے لیے تمام ممکنہ اقدامات جاری رکھے جائیں گے۔
