جہلم: ستھرا پنجاب پروگرام کے تحت صفائی کے انتظامات کا جائزہ لینے کے لیے ڈپٹی کمشنر جہلم میثم عباس نے سول لائن وائے کراس اور پیرا غیب چوک کا اچانک دورہ کیا۔ دورے کے دوران انہوں نے صفائی میں مصروف سینٹری سٹاف سے ملاقات کی اور جاری صفائی کے کام کا تفصیلی معائنہ کیا۔
ڈپٹی کمشنر نے موقع پر موجود ویسٹ مینجمنٹ کمپنی کے حکام کو ہدایت جاری کی کہ ہر گلی، محلہ، نالہ اور کچرا ڈپو مکمل طور پر صاف اور کوڑا کرکٹ سے پاک ہونا چاہیے۔ انہوں نے کہا کہ "ستھرا پنجاب” مہم حکومت پنجاب کی اولین ترجیح ہے اور ضلعی انتظامیہ اس پر مکمل نظر رکھے ہوئے ہے۔ انہوں نے اس امر پر زور دیا کہ شہر کو صاف اور صحت مند رکھنے کے لیے تمام متعلقہ اداروں کو اپنی ذمہ داریاں بخوبی نبھانی ہوں گی۔
میثم عباس نے متنبہ کیا کہ صفائی کے معاملات میں کسی قسم کی غفلت یا سستی ہرگز برداشت نہیں کی جائے گی، اور جو بھی اہلکار یا ادارہ کوتاہی کا مرتکب پایا گیا، اس کے خلاف سخت قانونی کارروائی عمل میں لائی جائے گی۔
