جہلم میں حساس اداروں اور پولیس نے سرچ آپریشن کرتے ہوئے 52 غیر قانونی افغان باشندوں کو گرفتار کر لیا۔
تفصیلات کے مطابق جہلم میں حساس اداروں اور پولیس نے مشترکہ کارروائی کرتے ہوئے سٹی سرکل کے مختلف علاقوں میں سرچ آپریشن کے دوران 52 غیر قانونی طور پر مقیم افغان باشندوں کو گرفتار کر لیا، جن میں خواتین اور بچے بھی شامل ہیں۔
پولیس کے مطابق گرفتار افراد پانچ خاندانوں پر مشتمل ہیں اور طویل عرصے سے غیر قانونی طور پر رہائش پذیر تھے۔ کارروائی کے دوران یہ بھی انکشاف ہوا کہ 10 سے زائد افغان باشندوں نے جعلی دستاویزات تیار کروا رکھی تھیں، جنہیں مزید تفتیش کے لیے تحویل میں لے لیا گیا ہے۔
تمام گرفتار افراد کو ہولڈنگ کیمپ منتقل کر دیا گیا ہے جبکہ مزید قانونی کارروائی جاری ہے۔
دوسری جانب جہلم پولیس نے ضلع بھر میں سکیورٹی کو فول پروف بنانے کے لیے سپیشل سرچ آپریشنز اور ناکہ بندی بھی کی۔ پولیس کے مطابق 21 مختلف مقامات پر کارروائیاں کرتے ہوئے 451 افراد، 185 گھروں اور 11 بس اسٹینڈز و ہوٹلوں کو چیک کیا گیا، جبکہ 64 افراد کی کرایہ داری کا اندراج بھی کیا گیا۔
پولیس حکام کا کہنا ہے کہ یہ اقدامات دہشت گردی اور جرائم پیشہ عناصر کی سرکوبی کے لیے کیے جا رہے ہیں۔
جہلم پولیس نے شہریوں سے اپیل کی ہے کہ وہ اپنے اردگرد کے ماحول پر کڑی نظر رکھیں اور کسی بھی مشکوک شخص یا غیر قانونی سرگرمی کے بارے میں فوری اطلاع دیں تاکہ بروقت کارروائی ممکن بنائی جا سکے۔
