جہلم: شہرکے وسط چوک اہلحدیث میں قائم پارک کے ارد گرد تجاوزات کی بھرمار، میو نسپل کمیٹی کا شعبہ انسداد تجاوزات خاموش تماشائی، خریداری کےلیے آنے والی خواتین، بچوں اور بزرگوں کو آمدورفت میں مشکلات کاسامنا ہے، ریڑھی بانوں نے پارک کے ارد گرد ریڑھیاں کھڑی کرکے راستہ بند کردیا۔
تفصیلات کے مطابق جہلم شہر کے وسط چوک اہلحدیث میں قائم پارک کے ارد گرد بااثر ریڑھی بانوں نے ریڑھیاں کھڑی کرکے خریداری کےلیے آنے والی خواتین بچوں بزرگوں کی امدورفت میں مشکلات پیداکررکھی ہیں۔
دوسری جانب میونسپل کمیٹی کاشعبہ تجاوزات مافیا کے خلاف کارروائیاں کرنے کی بجائے خواب خرگوش کے مزے لینے میں مصروف ہے جسکی وجہ خواتین سمیت سکول کالجز کے بچے بچیوں کو بھی آمدورفت میں خاصی دقت پیش آتی ہے۔
اس حوالے سے شہری تنظیموں کے عمائدین نے میڈیا نمائندگان سے گفتگو کرتے ہوئے کہا کہ پارک کے اردگرد ریرھیاں کھڑی ہونے سے 1122کی ایمبولینس، فائربرگیڈ کی گاڑیاں بھی ایمرجنسی کی صورت میں بازار اور اردگرد کے گلی محلوں میں داخل نہیں ہوسکتیں۔
انہوں نے کہا کہ میونسپل کمیٹی کے ذمہ داران کوچاہیے کہ انسداد تجاوزات کے عملے کو متحرک کریں اور تجاوزات قائم کرنے والے ریڑھی بانوں کی ریڑھیاں سرکاری تحویل میں لی جائیں اور خلاف ورزی کرنے والے افراد کے خلاف فوجداری مقدمات درج کیے جائیں تاکہ شہر کی سڑکیں بازار کشادہ ہوں اور خوبصورتی میں اضافہ ہوسکے۔
