دینہ میں میرج ہال مالکان کی جانب سے ون ڈش کے اصول کی کھلے عام خلاف ورزی جاری ہے۔ وزیر اعلیٰ پنجاب مریم نواز شریف کی ہدایت کے باوجود مقامی میرج ہال مالکان مہمانوں کو لذیذ کھانوں کی متعدد ڈشوں سے تواضع جاری رکھے ہوئے ہیں۔
تفصیلات کے مطابق وزیر اعلیٰ پنجاب کی ہدایت پر پنجاب بھر میں شادی بیاہ کے پروگراموں میں صرف ایک ڈش کی پیش کش کو لازمی قرار دیا گیا تھا تاکہ شادیوں میں غیر ضروری مہنگائی اور فرق کو ختم کیا جا سکے۔ تاہم دینہ کے میرج ہال مالکان نے اس ہدایت کو نظرانداز کرتے ہوئے میرج ہال کی بکنگ کے لیے اپنی مرضی کے مطابق متعدد ڈشز کے آرڈر لے کر مہمانوں کو بھرپور کھانے پیش کرنا شروع کر دیا۔
ذرائع کے مطابق انتظامیہ کی جانب سے صرف چند میرج ہال کو جرمانہ یا سیل کیا جاتا ہے، جس کے بعد مالکان دوبارہ غیر قانونی عمل شروع کر دیتے ہیں۔ ہال مالکان کا کہنا ہے کہ وہ باقاعدہ جرمانہ ادا کر کے اجازت حاصل کرتے ہیں، جس کی وجہ سے انہیں ون ڈش پر عملدرآمد کروانے میں دشواری پیش آتی ہے۔
شہریوں نے وزیر اعلیٰ پنجاب اور ڈپٹی کمشنر جہلم سے مطالبہ کیا ہے کہ ون ڈش کے اصول پر سختی سے عملدرآمد کروایا جائے تاکہ امیر و غریب کی شادیوں میں فرق ختم ہو اور معاشرے میں عدل و مساوات قائم رہے۔
