جہلم میں سی سی ڈی اور مسلح ملزمان کے درمیان مبینہ مقابلہ، ایک ملزم کو زخمی حالت میں گرفتار کر لیا گیا، دو ملزمان فرار ہو گئے۔
ترجمان سی سی ڈی جہلم کے مطابق جہلم کے علاقے ڈھوک منور روڈ پر دوران ناکہ بندی سی سی ڈی ٹیم نے ایک مشکوک موٹرسائیکل سوار کو رکنے کا اشارہ کیا جس پر سوار افراد نے پولیس پر اندھا دھند فائرنگ کر دی۔ فائرنگ کے دوران ایک گولی کانسٹیبل کے سینے پر لگی تاہم خوش قسمتی سے بلٹ پروف جیکٹ کی وجہ سے وہ محفوظ رہے۔
سی سی ڈی ٹیم کی جوابی حکمتِ عملی کے نتیجے میں ایک ملزم کو زخمی حالت میں گرفتار کر لیا گیا، جس کی شناخت علی رضا ولد کرم بخش سکنہ منڈی بہاؤالدین کے نام سے ہوئی۔ گرفتار ملزم کو طبی امداد کے لیے ہسپتال منتقل کر دیا گیا جبکہ اس کے دو نامعلوم ساتھی موقع سے فرار ہونے میں کامیاب ہو گئے۔
پولیس ذرائع کے مطابق گرفتار ملزم علی رضا کے خلاف سول لائنز منڈی بہاؤالدین تھانہ میں موٹرسائیکل چوری، منشیات اور ڈکیتی سمیت متعدد مقدمات درج ہیں۔ ملزم سے 8 ایم ایم رائفل بھی برآمد ہوئی ہے۔
واقعہ کے بعد علاقے میں سرچ آپریشن شروع کر دیا گیا ہے تاکہ فرار ملزمان کو بھی گرفتار کیا جا سکے۔ سی سی ڈی حکام کا کہنا ہے کہ علی رضا سے مزید انکشافات متوقع ہیں۔
