جہلم: انجمن آرائیاں ضلع جہلم کے ضلعی صدر حاجی حبیب الرحمن چوہدری کی جانب سے اپنی رہائش گاہ کالا دیو میں انجمن آرائیاں کے عہدیداران، ممبران اور جہلم پریس کلب کے صحافیوں کے اعزاز میں عید ملن پارٹی کا اہتمام کیا گیا۔ محبت، اخوت اور باہمی احترام سے بھرپور اس تقریب میں ضلع بھر سے تعلق رکھنے والی سیاسی، سماجی، صحافتی اور عوامی شخصیات نے بڑی تعداد میں شرکت کی۔
تقریب میں جہلم پریس کلب کے چیئرمین چوہدری عابد محمود کی قیادت میں صحافیوں کے وفد کا پرتپاک استقبال کیا گیا اور معزز مہمانوں کو پھولوں کے گلدستے پیش کیے گئے۔ وفد میں انجمن آرائیاں ضلع جہلم کے میڈیا کوآرڈینیٹر و صدر ڈسٹرکٹ یونین آف جرنلسٹس چوہدری مہربان حسین سمیت متعدد سینئر صحافی شامل تھے۔
تقریب کی سرپرستی معروف قانون دان چوہدری محمد یعقوب ایڈووکیٹ، چوہدری علی اصغر اور ضلعی صدر انجمن آرائیاں حاجی حبیب الرحمن چوہدری نے کی۔
اپنے خطاب میں چوہدری محمد یعقوب ایڈووکیٹ نے عید ملن پارٹی کو باہمی محبت، بھائی چارے اور سماجی ہم آہنگی کے فروغ کی ایک خوبصورت روایت قرار دیتے ہوئے کہا کہ ایسی تقریبات معاشرے میں مثبت اقدار کو فروغ دینے کا مؤثر ذریعہ ہیں۔
معروف سیاسی و سماجی شخصیت چوہدری علی اصغر نے کہا کہ قوموں کی ترقی صرف انفراسٹرکچر سے نہیں بلکہ انسانوں کے درمیان مضبوط تعلقات، اخوت اور باہمی احترام سے وابستہ ہوتی ہے۔ انہوں نے کہا کہ عید ملن جیسی تقریبات نئی نسل میں رواداری، محبت اور اجتماعی سوچ کو فروغ دیتی ہیں۔
معروف قانون دان ایڈووکیٹ چوہدری زاہد نے انجمن آرائیاں کی فلاحی اور تنظیمی سرگرمیوں کو سراہتے ہوئے کہا کہ نوجوانوں کی رہنمائی، تعلیم اور اجتماعی مسائل کے حل کے لیے ایسی مثبت سرگرمیوں کا تسلسل وقت کی اہم ضرورت ہے۔
اس موقع پر ایڈووکیٹ چوہدری کاشف اسلام نے کہا کہ معاشرے میں اتحاد، تعلیم اور خدمت خلق کے فروغ کے لیے ہر مثبت اقدام میں بھرپور کردار ادا کیا جانا چاہیے کیونکہ قوموں کی ترقی کا راز کردار سازی اور نوجوان نسل کی بہترین تربیت میں پوشیدہ ہے۔
ضلعی صدر انجمن آرائیاں حاجی حبیب الرحمن چوہدری نے اپنے خطاب میں کہا کہ ان کا مشن برادری کے نوجوانوں کو تعلیم یافتہ، باصلاحیت اور ہنر مند بنانا ہے تاکہ وہ مستقبل کے چیلنجز کا اعتماد کے ساتھ مقابلہ کر سکیں۔ انہوں نے کہا کہ تعلیم، کردار سازی اور مثبت تربیت ہی ترقی یافتہ معاشرے کی بنیاد ہیں۔
انہوں نے مزید کہا کہ انجمن آرائیاں ضلع جہلم نوجوانوں کی تعلیمی اور سماجی ترقی کے لیے ہر ممکن وسائل بروئے کار لا رہی ہے اور اس مقصد کے حصول کے لیے تمام اہلِ برادری کو اپنا کردار ادا کرنا ہوگا۔
حاجی حبیب الرحمن چوہدری نے اس عزم کا اعادہ کیا کہ انجمن آرائیاں ضلع جہلم کو ایک فعال، مضبوط اور مثالی تنظیم بنایا جائے گا جو خدمت، اخوت اور فلاحِ عامہ کے میدان میں نمایاں کردار ادا کرے۔
تقریب خوشگوار ماحول میں اختتام پذیر ہوئی جہاں شرکاء نے ایک دوسرے کو عید کی مبارکباد پیش کی اور انجمن آرائیاں ضلع جہلم کی سماجی، فلاحی اور تعلیمی سرگرمیوں کو مزید مؤثر بنانے کے عزم کا اظہار کیا۔
