جہلم: محکمہ جنگلات جہلم کے ڈپٹی کنزرویٹر آف فاریسٹ محمد نعمان ارشد نے کہا ہے کہ جنگلات میں لگنے والی آگ پر قابو پانے کے لیے محکمہ جنگلات کا عملہ پوری طرح متحرک ہے اور فیلڈ میں 24 گھنٹے مسلسل خدمات سرانجام دے رہا ہے۔
انہوں نے کہا کہ محکمہ جنگلات کی ٹیمیں شہریوں کے تحفظ، قیمتی قدرتی وسائل کے بچاؤ اور ماحول کے تحفظ کے لیے فرنٹ لائن پر ہمہ وقت موجود ہیں اور کسی بھی ہنگامی صورتحال سے نمٹنے کے لیے مکمل طور پر تیار ہیں۔
نعمان ارشد نے شہریوں سے اپیل کی کہ وہ بے بنیاد افواہوں، غیر مصدقہ خبروں اور گمراہ کن اطلاعات پر ہرگز کان نہ دھریں بلکہ صرف محکمہ جنگلات کے سرکاری سوشل میڈیا پیجز اور مستند سرکاری ذرائع سے جاری کردہ معلومات پر اعتماد کریں۔
انہوں نے واضح کیا کہ حقائق کے برعکس کسی بھی قسم کے پروپیگنڈے یا غیر تصدیق شدہ معلومات کو پھیلانے سے گریز کیا جائے تاکہ عوام میں بے چینی اور غلط فہمیاں پیدا نہ ہوں۔
ڈپٹی کنزرویٹر آف فاریسٹ نے مزید کہا کہ کسی بھی ہنگامی صورتحال، شکایت یا معلومات کی تصدیق کے لیے شہری فوری طور پر فاریسٹ ہیلپ لائن 1084 پر رابطہ کریں تاکہ بروقت کارروائی کو یقینی بنایا جا سکے۔
انہوں نے اس عزم کا اظہار کیا کہ محکمہ جنگلات جنگلاتی وسائل کے تحفظ، آگ کی روک تھام اور ماحولیاتی بہتری کے لیے اپنی ذمہ داریاں پوری تندہی سے انجام دیتا رہے گا۔
