پنڈدادنخان معاشی، سماجی اور سیاحتی طور پر تباہ ہو رہا ہے، بے روزگاری اور جرائم میں تیزی سے اضافہ ہو رہا ہے، صنعتی ترقی رک گئی ہے، فوڈ سپلائی لائن کٹ چکی ہے، صحت کی سہولیات تیزی سے کم ہو رہی ہیں، تعلیمی معیار گر رہا ہے۔
ان خیالات کا اظہار اسسٹنٹ کمشنر پنڈدادنخان اسامہ شہرون نے للِہ تا جہلم ڈیول کیرج وے منصوبے کی تاخیر کے باعث تحصیل پنڈدادنخان کے مسائل کو اجاگر کرتے ہوئے ایف ڈبلیو او چوران کیمپ کو ایک خط میں کیا۔
اسسٹنٹ کمشنر نے ایف ڈبلیو او کو لکھے گئے خط میں کہا کہ للِہ تا جہلم ڈیول کیرج وے منصوبے پر تاخیر فنڈز کی عدم فراہمی، تعمیراتی کام کی بندش کے باعث تحصیل کھنڈرات کا منظر پیش کر رہی ہے۔ تمام تجارتی مراکز، ذرائع آمدورفت نہ ہونے کے باعث مافیا کے قبضے میں جا چکے ہیں جس کے باعث قیمتوں کا کنٹرول مشکل ہو رہا ہے۔
انہوں نے خط میں لکھا کہ سفری سہولیات نہ ہونے کے باعث ڈاکٹرز کی عدم دلچسپی کے باعث تحصیل ہیڈ کوارٹر ہسپتال پنڈدادنخان سمیت بنیادی مراکز صحت خالی ہو رہے ہیں جبکہ دنیا کی دوسری بڑی کان نمک کھیوڑہ میں سیاحوں کی ریکارڈ کمی واقعہ ہوئی ہے۔ قلعہ نندنا باغانوالہ البیرونی کی لیبارٹری تک سیاحوں کی رسائی ناممکن ہو رہی ہے۔
اسسٹنٹ کمشنر نے خط میں لکھا کہ معدنیات کی دولت سے مالا مال تحصیل واحد رابطہ سڑک کی عدم تعمیر کے باعث ریونیو اکٹھا نہ کر پا رہی، وسائل کی عدم فراہمی کے خلاف عوامی مشکلات میں دن بدن اضافہ ہو رہا ہے۔ طلبہ، مسافروں، خواتین اور بزرگ کو روزانہ کی بنیاد پر شدید مشکلات کا سامنا ہے، ضلع جہلم کی تاریخی تحصیل اس وقت بدترین معاشی سماجی سیاحتی بحران کی زد میں ہے۔
اسسٹنٹ کمشنر پنڈدادنخان اسامہ شہرون نے ایف ڈبلیو او حکام سے ڈیول کیرج وے منصوبے پر فوری کام شروع کرنے کی ضرورت کو اجاگر کیا ہے۔
سماجی حلقوں، ورکنگ کمیٹی للِہ جہلم روڈ سمیت تحصیل بھر کے سماجی حلقوں نے اسسٹنٹ کمشنر پنڈدادنخان اسامہ شہرون کی کاوشوں کو سراہتے ہوئے ایف ڈبلیو او حکام سے فوری کام شروع کرنے کا مطالبہ کیا ہے۔
