لندن: آزاد کشمیر میں مہنگائی کے مسئلے سے خوش اسلوبی سے نمٹنے پر کشمیریوں کی جانب سے لندن میں حکومت پاکستان سے اظہار تشکر کیلئے مظاہرہ کیا گیا۔ مظاہرے میں مختلف سیاسی جماعتوں کے لوگوں نے کثیر تعداد میں شرکت کی۔
اس موقع پر نعیم عباسی، اسلم ڈوگر، پیپلز پارٹی کے رہنما ریاض کوہمروی، امجد امین بوبی، سابق میئر سلاؤ امجد عباسی، کونسلر قیصر چوہدری و دیگرنے کہا کہ وہ حکومت پاکستان کی جانب سے آزادکشمیر کے عوام کیلئے 23ارب روپے کے امدادی پیکیج کے لیے شکر گزار ہیں۔ آزاد کشمیر میں حکومت پاکستان کے مہنگائی پر قابو پانے کے لئے اٹھائے گئے قابل ستائش اقدامات کو سراہتے ہیں۔ بجلی اور آٹے جیسی بنیادی اشیائے ضرورت کی قیمتوں میں نمایاں کمی سے عوام کو بڑا ریلیف ملا ہے۔
انہوں نے کہا کہ وزیراعظم پاکستان شہباز شریف نے آزادکشمیر کے معاملے میں خصوصی دلچسپی لے کر کر مسائل کوحل کیا۔
شرکاء نے کہا کہ ملک دشمن عناصر نے کشمیری اور پاکستانی عوام میں تفریق ڈالنے کا مذموم منصوبہ بنا رکھا تھا لیکن حکومت پاکستان کے بروقت اقدامات سے ملک دشمن عناصر کا منصوبہ ناکام ہو گیا ہے۔ ہم یہاں حکومت پاکستان کا شکریہ ادا کرنے اکھٹے ہوئے ہیں پاکستان نے ہمیشہ کشمیریوں کے حق خود ارادیت کیلئے اخلاقی، سفارتی اور سیاسی حمایت جاری رکھی ہے۔ اقوام متحدہ اور دیگر عالمی فورمز پر مسئلہ کشمیر کو اجاگر کیا۔
انہوں نے کہا کہ آج کے مظاہرے سے ملک دشمن عناصر کو پیغام دینا چاہتے ہیں کہ کشمیری اور پاکستانی خون کے رشتے میں بندھے ہیں جنہیں کوئی الگ نہیں کر سکتا۔ انہوں نے کہا کہ مقبوضہ کشمیر کے عوام کی جدوجہد کی حمایت جاری رکھی جائے گی اور وہ دن دور نہیں جب مقبوضہ کشمیر کے عوام آزادی کا سورج دیکھیں گے۔
مظاہرے کے شرکاء نے پاکستان اور پاک فوج کی حمایت میں زوردار نعرے بھی لگائے۔
