جہلم: مرکزی علماء کونسل ضلع جہلم کے خصوصی اجلاس میں علماء کرام نے ملک میں بڑھتی ہوئی دہشت گردی پر شدید رنج و غم کا اظہار کرتے ہوئے اسے ملکی سلامتی اور امن و امان پر حملہ قرار دیا۔
اجلاس میں اس بات پر زور دیا گیا کہ پوری قوم کو متحد ہو کر ملک دشمن عناصر، خصوصاً فتنۃ الخوارج کے مذموم عزائم کو ناکام بنانا ہوگا۔
علماء کرام نے اپنے خطاب میں کہا کہ دہشت گردی کے خلاف افواجِ پاکستان کی لازوال قربانیاں اور جدوجہد قابلِ تحسین ہیں۔ انہوں نے کہا کہ موجودہ حالات کے تناظر میں پوری قوم کو پاک فوج کے شانہ بشانہ کھڑے ہو کر بیداری اور اتحاد کا ثبوت دینا ہوگا۔
اجلاس میں بتایا گیا کہ 29 نومبر کو جامع مسجد نور سکھا میں ہونے والی سالانہ سیرۃ النبی ﷺ کانفرنس کے تمام تر انتظامات مکمل کر لیے گئے ہیں۔ اس موقع پر حکیم قاری شبیر احمد عثمانی نے کہا کہ کانفرنس میں مرکزی علماء کونسل پاکستان کے قائدین کی آمد پر شاندار اور والہانہ استقبال کیا جائے گا۔
اجلاس کے آخر میں ملک کی سلامتی، امن و امان، حالیہ دہشت گردی میں شہید ہونے والے شہریوں اور پاک فوج کے غیور جوانوں کے درجات کی بلندی کے لیے خصوصی دعا کی گئی۔ علماء کرام نے پاک فوج کی قربانیوں کو خراجِ تحسین پیش کرتے ہوئے اس عزم کا اظہار کیا کہ ملک دشمن سازشوں کا ڈٹ کر مقابلہ کیا جائے گا۔
اجلاس میں حکیم قاری شبیر احمد عثمانی، مولانا قاری اشرف، مولانا انس الرحمٰن، قاری ابصار ایوب، قاری عاصم عرفان، مولانا محمد مدثر، قاری عمران، ماسٹر محمد مبارک، مولانا حکیم زبیر الحسن، شاکر علی، مولانا مرتضیٰ تنویر اور قاری محمد صدیق نے شرکت کی۔
