جہلم شہر اور گردونواح میں کیمیکل ملے ناقص اور مضرِ صحت دودھ کی فروخت نے شہریوں کی زندگی اجیرن بنا دی ہے۔
تفصیلات کے مطابق اندرونِ شہر کے بازاروں میں دھڑلے سے یہ مکروہ دھندہ جاری ہے، جس کے باعث شہری مجبوراً یہ دودھ خریدنے پر مجبور ہیں۔ کیمیکل ملا دودھ استعمال کرنے سے خواتین، بچے، اور بزرگ مختلف بیماریوں میں مبتلا ہو رہے ہیں۔
متعدد مرتبہ میڈیا کی جانب سے نشاندہی کے باوجود پنجاب فوڈ اتھارٹی اور متعلقہ ادارے خاموش تماشائی بنے ہوئے ہیں۔
سماجی، فلاحی تنظیموں اور عوامی حلقوں نے وزیر اعلیٰ پنجاب، چیف سیکرٹری پنجاب اور ڈی جی پنجاب فوڈ اتھارٹی سے فوری کارروائی کا مطالبہ کیا ہے، تاکہ شہریوں کی صحت کو لاحق خطرات کا خاتمہ کیا جا سکے۔
