جہلم: تھانہ چوٹالہ پولیس نے احسن اقدام کرتے ہوئے ماں اور بیٹی کے درمیان پیدا ہونے والے تنازع کو خوش اسلوبی سے حل کر دیا۔
تفصیلات کے مطابق میرپور آزاد کشمیر سے تعلق رکھنے والی ایک خاتون اپنے والدین سے ناراض ہو کر جہلم کے تھانہ چوٹالہ کے علاقہ میں آ گئی۔ واقعہ کی اطلاع ملنے پر خاتون کی والدہ تھانے پہنچیں اور بیٹی کے حوالے سے شکایت درج کروائی۔
والدہ نے بیٹی کو منانے کی کوشش کی تاہم وہ رضامند نہ ہوئی، جس پر تھانہ چوٹالہ پولیس نے فوری طور پر بوڑھی والدہ کے ہمراہ موقع پر پہنچ کر خاتون سے بات چیت کی اور مؤثر انداز میں دونوں کے درمیان صلح کروا دی۔
پولیس کی کوششوں سے ماں بیٹی کے درمیان راضی نامہ طے پایا، جس کے بعد خاتون کو بحفاظت والدہ کے ہمراہ واپس آزاد کشمیر روانہ کر دیا گیا۔
ڈی پی او جہلم شفیق احمد چوہدری کے مطابق عوامی مسائل کا فوری اور میرٹ پر حل، باہمی صلح صفائی کو فروغ دینا اور شہریوں کا اعتماد بحال رکھنا جہلم پولیس کی اولین ترجیح ہے، جسے ہر صورت یقینی بنایا جا رہا ہے۔
