لندن: یو کے پاکستان بزنس کونسل کی جانب سے سیالکوٹ چیمبر آف کامرس اینڈ انڈسٹری کے برطانیہ کے دورہ پر آئے ہوئے وفد کے اعزاز میں عشائیہ دیا گیا ۔ اس عشائیے کا اہتمام لندن میں پاکستانی سفارتخانے میں کیا گیا ۔
اس موقع پر پاکستانی ہائی کمشنر ڈاکٹرمحمد فیصل نے کہا کہ ہم پاکستانی وفد کو برطانیہ میں خوش آمدید کہتے ہیں۔ پاکستانی سفارخانہ صنعتکاروں کو ہر طرح کی سہولت فراہم کرے گا۔ انہوں نے کہاکہ حال ہی میں قطر میں ہونے والے فٹبال ورلڈ کپ میں پاکستان کا فٹبال استعمال ہوا جو سیالکوٹ میں بن رہا ہے اور یہ پاکستان کے لئے بڑے اعزاز کی بات ہے ۔
ہائی کمشنر نے مزید کہا کہ سفارتخانے کی خواہش ہے کہ پاکستان کے اداروں کو منظم اور متحد ہونے کی ضرورت ہے۔ ان کا کہنا تھا کہ سیالکوٹ کے طبی آلات کا متبادل پوری دنیا میں نہیں ہے۔
یوکے پاکستان بزنس کونسل کے صدر عطاءحق نے اپنے افتتاحی کلمات میں کہا کہ پاکستان میں ایمزون کواجازت نہیں مل سکی حالانکہ یہ بہت ضروری اور وقت کا تقاضا ہے اس سے اقتصادی ترقی کا پہیہ رواں دواں ہو سکتا ہے ۔سیالکوٹ کے گارمنٹس، کھیلوں اور جراحی کے آلات کی برآمدات میں اضافہ ممکن ہے۔
عطا حق نے کہا کہ اس سلسلہ میں شفیق شہزاد بہت محنت کر رہے ہیںجو کہ قابل تحسین ہے ۔ پاکستان اور انگلینڈ کے درمیان بزنس اشتراک ضروری ہے۔ وفد کے سربراہ اکرام الحق نے کہا کہ سیالکوٹ کی تاریخ میں پہلا وفد برطانیہ پہنچا ہے اوورسیز پاکستانی ہماری جان ہیں، وفد میں دس افراد شامل ہیں جو کھیلوں ، طبی آلات، گارمنٹس اور چمڑے کی صنعت سے تعلق رکھتے ہیں۔
انھوں نے کہا کہ ا سکاٹش بینڈ مکمل سیالکوٹ میں بنا کر دنیا میں ایکسپورٹ کیا جاتا ہے، سیالکوٹ کی مصنوعات 140ملکوں میں ایکسپورٹ کی جاتی ہیں۔پاکستان میں مستحکم حکومت کی ضرورت ہے، پاکستان اور برآمدات کے لئے ہمیشہ ہر حکومت سے تعاون کیا ہے، برطانیہ اور پاکستان کے درمیان تجارتی حجم بہت کم ہے جس کو بڑھانے کی ضرورت ہے،پاکستانی برآمدات کو بڑھانے کے ضرورت ہے اور موجودہ دورہ سے بہت فائدہ ہو گا۔ پاکستانی وفد لندن کے بعد مانچسٹر کا دورہ بھی کرے گا۔
پاکستان سفارتخانہ کے منسٹر ٹریڈ اینڈ انویسٹمنٹ شفیق احمد شہزاد نے کہا کہ پاکستان کے لئے کھیلوں کا سامان برآمد کرنے کے بے شمار مواقع موجود ہیں۔انہوں نے کہا کہ سےسیالکوٹ چمبر کے وفد کی برطانیہ آمد پر دلی مسرت ہوئی اور ہم چاہتے ہیں کہ سیالکوٹ چیمبر کے ذریعے پاکستان میں سرمایہ کاری کو یقینی بنایا جائے ۔
اس سلسلہ میں پاکستان ہائی کمیشن نہ صرف لندن بلکہ برطانیہ کے دیگر مختلف شہروں میں سیالکوٹ چیمبر کے روڈ شوز اور تقاریب کا اہتمام کرے گا جن میں پاکستان میں بننے والی کھیلوں کی اشیاءکی نمائش اور ان کی خرید و فروخت کو یقینی بنایا جائے گا ۔
شفیق شہزاد نے کہا کہ یوکے پاکستان بزنس کونسل پاکستان کی ترقی اور خوشحالی کے لئے سرمایہ کاری کو یقینی بنانے کے لئے اہم کردار ادا کر رہی ہے جو قابل ستائش ہے ۔
اس موقع پر سینئر بورڈ ممبر انصر محمود چودھری نے بھی اپنے خیالات کا اظہار کیا اور سیالکوٹ چیمبر کو خوش آمدید کہا اور ہر ممکن تعاون کا یقین دلایا۔
انصر محمود چودھری نے کہا کہ اگر سیالکوٹ چیمبر کو برطانیہ میں کسی بھی حوالے سے قانونی مشورے یا مدد کی ضرورت ہو گی تو اس معاملہ میں بھی یو کے پاکستان بزنس کونسل بھرپور تعاون فراہم کرے گی ۔ اس موقع پر دستاویزی فلم دکھائی گئی اور وفد کے ارکان کو یادگاری شیلڈز دی گئیں۔
