مانچسٹر: سیاسی اور سماجی رہنما رضیہ چوہدری نے صحافیوں کے اعزاز میں استقبالیہ کا اہتمام کیا۔
اس موقع پر پاکستانی قونصل جنرل طارق وزیر خان نے بطور مہمان خصوصی خطاب کرتے ہوئے کہا کہ اوور سیز پاکستانیوں کی حب الوطنی کو اجاگر کرنے اور ملکی حالات سے آگاہ رکھنے کیلئے پاکستانی صحافیوں کی خدمات قابل تحسین ہیں۔
انہوں نےکہاکہ برطانیہ میں آباد پاکستانی صحافی برطانیہ اور پاکستان کے تعلقات میں مزید فروغ کیلئے کوشاں ہیں۔ انہوں نے مثبت اور تعمیری صحافت کی اہمیت پر زور دیا۔
میزبان رضیہ چوہدری نے تعمیری صحافت کرنے پر صحافیوں کو سراہا اورکہا کہ ہر کام کیلئے اس کی تعلیم اور تربیت ہونا ضروری ہے۔ پاکستان میں 8فروری کے انتخابات غیر جانبدار، آزاد اور شفاف ہونے چاہئیں اور ووٹرز کو اپنا حق رائے دہی قومی فریضہ سمجھ کر استعمال کرنا چاہئے تاکہ ملک میں جمہوریت پروان چڑھے۔
تقریب کے شرکاء میں رضوان نصیر آف مرالہ نیازی، طاہر چوہدری، چوہدری عارف پندھیر ،غلام مصطفیٰ مغل، صابر رضا، چوہدری وسیم احمد، لار ڈ میئر مانچسٹر کونسلر عابد چوہان، پرویز مسیح، عمران خلیل، سید کاشف، سجاد شاہ، اقبال صدیقی، عامر خان، چوہدری انور ودیگر نے بھی معیاری صحافت اور ملک وقوم کیلئے خدمات پر زور دیا۔
آخر میں برٹش پاکستانی گلوکار نے ملی نغمہ جیوے جیوے پاکستان سنا کر سماں باندھ دیا۔ اس موقع پر صحافیوں اور کمیونٹی رہنماؤں کو قونصل جنرل طارق وزیر اور رضیہ چوہدری نے ایوارڈ واسناد پیش کیں۔
