سوہاوہ: عدالت نے منشیات کے مقدمہ نمبر 99/24 بجرم CNSA 9 (1) 3C تھانہ سوہاوہ کا فیصلہ سناتے ہوئے مجرم محمد شمریز کو 10 سال قید اور 1 لاکھ 60 ہزار روپے جرمانہ کی سزا سنا دی۔
مجرم محمد شمریز کو سال 2024 میں منشیات فروشی کے جرم میں گرفتار کیا گیا تھا۔ جہلم پولیس نے ملزم کو ٹریس کر کے گرفتار کیا اور ٹھوس شواہد کے ساتھ چالان عدالت میں پیش کیا۔ پولیس کی جانب سے مقدمے کی مؤثر پیروی کی گئی، جس کے نتیجے میں عدالت نے جرم ثابت ہونے پر مجرم کو قرار واقعی سزا دی۔
ڈی پی او جہلم طارق عزیز سندھو نے عدالتی فیصلے پر تبصرہ کرتے ہوئے کہا کہ منشیات فروش معاشرے کا ناسور ہیں اور ان کے خاتمے کے لیے بھرپور آپریشن جاری رہے گا۔ انہوں نے مزید کہا کہ جہلم پولیس منشیات کے خلاف زیرو ٹالرنس پالیسی پر عمل پیرا ہے اور آئندہ بھی ایسے عناصر کے خلاف سخت کارروائی جاری رکھی جائے گی۔
ڈی پی او جہلم نے اس کامیاب کارروائی پر انویسٹی گیشن اور لیگل ٹیموں کو شاباش دی اور انہیں تعریفی سرٹیفکیٹ اور نقد انعام دینے کا اعلان کیا۔ انہوں نے کہا کہ پولیس فورس کا ہر اہلکار عوام کو منشیات جیسے زہر سے محفوظ رکھنے کے لیے دن رات محنت کر رہا ہے اور مستقبل میں بھی اسی عزم کے ساتھ اپنی ذمہ داریاں ادا کرتا رہے گا۔
