جہلم: وزیراعلیٰ پنجاب کی بیوٹیفیکیشن سکیم اور ڈپٹی کمشنر جہلم میر رضا اوزگن کی ہدایات پر ضلع جہلم کے ماڈل بازاروں میں جاری خوبصورتی اور تزئین و آرائش کے کام کا جائزہ لینے کے لیے اسسٹنٹ کمشنرز نے اپنی اپنی تحصیلوں کے ماڈل بازاروں کے دورے کیے۔
دوروں کے دوران ماڈل بازاروں میں جاری ترقیاتی و تزئینی کاموں کی رفتار اور معیار کا تفصیلی معائنہ کیا گیا۔ اس موقع پر دیدہ زیب برقی روشنیوں، داخلی و خارجی راستوں سمیت شہریوں کے لیے فراہم کی جانے والی دیگر سہولیات کا بھی جائزہ لیا گیا، جبکہ متعلقہ عملے سے کام کی پیش رفت اور انتظامی امور کے بارے میں معلومات حاصل کی گئیں۔
اسسٹنٹ کمشنرز نے متعلقہ عملے کو ہدایت کی کہ جاری خوبصورتی اور تعمیراتی کام مقررہ مدت میں مکمل کیے جائیں اور کام کے معیار پر کسی صورت سمجھوتہ نہ کیا جائے۔ انہوں نے ماڈل بازاروں میں صفائی ستھرائی، نظم و ضبط اور بہتر ماحول کو ہر صورت برقرار رکھنے کی بھی ہدایت کی۔
اس موقع پر اسسٹنٹ کمشنرز نے کہا کہ ماڈل بازاروں کی خوبصورتی میں اضافے کے ساتھ ساتھ شہریوں کو بہتر اور معیاری سہولیات کی فراہمی بھی اولین ترجیح ہے۔ انہوں نے متعلقہ حکام کو ہدایت کی کہ جاری منصوبوں کی مؤثر نگرانی کرتے ہوئے کام کے معیار اور رفتار کو یقینی بنایا جائے تاکہ بیوٹیفیکیشن سکیم کے ثمرات شہریوں تک پہنچ سکیں۔
