سوہاوہ: محکمہ صحت کی جانب سے پولیو مہم 28 اکتوبر سے ضلع جہلم سمیت ملک بھر میں شروع کی جا رہی ہے، اس حوالے سے سوہاوہ کے مقامی کالج سے آگاہی مہم کا آغاز کر دیا گیا ہے۔
تقریب کا آغاز تلاوت قران پاک سے کیا گیا، بعد ازاں کالج ہذا کی طالبات نے پولیو کے حوالے سے تقاریر میں حصہ لیا۔
طالبات کا کہنا تھا کہ تقریباً دنیا بھر کے ممالک اس مرض سے نجات پا چکے ہیں، بدقسمتی سے صرف پاکستان اور افغانستان میں پولیو کیسز سامنے آ رہے ہیں۔ آئندہ ہمیں پولیو سے بچنے کے لیے احتیاطی تدابیر اپنانی ہوں گی۔
اس تقریب میں خصوصی طور پر ڈاکٹر شعیب کیانی، ڈاکٹر فہد اور اور پولیو انچارج ٹی ایچ کیو ہسپتال سوہاوہ کاظم شاہ نے شرکت کی۔
تقریب کے اختتام پر کاظم شاہ کا کہنا تھا کہ سوہاوہ میں بھی ہماری ٹیمیں گھر گھر جا کر پانچ سال سے کم عمر کے بچوں کو پولیو کے قطرے پلائیں گی اور ساتھ وٹامن اے کی اضافی خوراک بھی دیں گی۔ تمام شہریوں سے گزارش ہے کہ اپنے پانچ سال سے کم عمر کے بچوں کو پولیو ویکسین سے بچاؤ کے دو قطرے ضرور پلائیں، ہمارا عزم پولیو فری پاکستان ہے۔
تقریب کے اختتام پر طالبات میں تعریفی اسناد بھی تقسیم کی گئی۔
