پنڈدادنخان اور گردونواح میں بارشوں نے تباہی مچا دی، نشیبی علاقے زیر آب آ گئے، مسافر بس سیلابی ریلے میں بہہ گئی، 3 افراد معمولی زخمی ہو گئے، بارشی پانی گھروں میں داخل ہو گیا، شہریوں کو شدید مشکلات کا سامنا ہے۔
تفصیلات جہلم کی تحصیل پنڈدادنخان میں بارشوں نے تباہی مچا دی، بارش سے نشیبی علاقے زیر آب آ گئے، کھیوڑہ سمیت مختلف علاقوں میں بارش کا پانی گھروں میں داخل ہو گیا جس سے شہریوں کو مشکلات کا سامنا کرنا پڑ رہا ہے۔
بارش کےباعث گلیوں اورشاہراؤں پر پانی کھڑا ہوگیا اور بجلی کے متعدد فیڈرز ٹرپ ہوجانے سے بجلی کی فراہمی معطل ہوگئی۔ مرکزی شاہراہوں پر گاڑیاں پھنس گئیں،مسافروں کو مشکلات کا سامنا کرنا پڑا۔ اسسٹنٹ کمشنر پنڈدادنخان حلیمہ منیر کی زیر نگرانی مختلف مقامات پر امدادی سرگرمیاں جاری ہیں۔
پنڈدادنخان میں برساتی پانی میں پھنسے افراد کو نکالنے کے لیے ریسکیو ٹیمیں موقع پر موجود ہیں اور امدادی سرگرمیاں جاری ہیں۔ بارش سے یونین کونسل ساؤوال کا دفتر پانی میں ڈوب گیا، ریسکیو 1122 نے یونین کونسل کا قیمتی سرکاری ریکارڈ اور سامان محفوظ مقام پر منتقل کیا۔
کھیوڑہ پنڈ دادنخان روڈ پر سیلابی ریلے میں مسافر بس بھی بہہ گئی، بس الٹنے سے تین افراد معمولی زخمی ہو گئے، بس میں 15افراد سوار تھے اور ریسکیو 1122 نے تمام افراد کو بس سے بحفاظت نکال لیا، تین معمولی زخمی افراد کو موقع پر ابتدائی طبی امداد فراہم کر دی گئی۔
بس میں سوار تمام 15 مسافر فلائنگ سیمنٹ فیکٹری پنڈ دادنخان میں ملازمت کرتے ہیں اور اپنی شفٹ ختم کر کے فیکٹری کی بس پر رہائشگاہ کی طرف جا رہے تھے۔
کھیوڑہ راجہ کھیت برساتی پانی کے باعث سوئی گیس کی مین لائن ٹوٹ گئی، گیس کی فراہمی منقطع ہو گئی، سوئی گیس کا عملہ بحالی کے کاموں میں مصروف ہے۔
گولپور گاؤں کے اندر پہاڑ سے برساتی پانی داخل ہو گیا جس سے گولپور کی مین گلی ندی کا منظر پیش کرنے لگی، اہل علاقہ کو شدید اذیت کا سامنا ہے۔ کندوال میں پل نہ ہونے سے سکول سے آنے والے بچوں کو لوگ اپنی مدد اپ کے تحت خطرناک طریقے سے سڑک کراس کرواتے رہے۔
