جہلم: گرمی کی شدت میں اضافے کے ساتھ ہی جہلم شہر اور گردونواح میں ناقص اور مضر صحت آئس کریم، قلفیاں اور برفیلے مشروبات کی فروخت میں تیزی آ گئی ہے، جس کے باعث شہری بالخصوص بچے اور نوجوان مختلف بیماریوں کا شکار ہونے لگے ہیں۔
رپورٹ کے مطابق ضلع بھر کے دیہاتوں، قصبوں اور شہری علاقوں میں غیر معیاری اشیاء سے تیار کردہ آئس کریم، قلفیاں، برف والے گولے، قلفہ فالودہ، بادام والی سردائی اور املی و آلو بخارے کے نام پر مشروبات کھلے عام فروخت کیے جا رہے ہیں۔ یہ اشیاء حفظانِ صحت کے اصولوں کے برعکس تیار کی جا رہی ہیں۔
شہریوں کا کہنا ہے کہ ان اشیاء کے استعمال سے گلے کی خرابی، نزلہ، زکام، بخار اور دیگر بیماریوں میں اضافہ ہو رہا ہے، جبکہ سادہ لوح دیہاتی آبادی زیادہ متاثر ہو رہی ہے۔
عوامی حلقوں نے ڈپٹی کمشنر جہلم اور پنجاب فوڈ اتھارٹی سے مطالبہ کیا ہے کہ مضر صحت اشیاء فروخت کرنے والوں کے خلاف فوری کارروائی کی جائے اور چیکنگ کا مؤثر نظام قائم کیا جائے تاکہ شہریوں کی صحت کا تحفظ یقینی بنایا جا سکے۔
