جہلم شہر کے وسط میں قائم غیر قانونی ویگن سٹینڈ ختم، شہریوں نے ویگن اڈا ختم ہونے کےبعد سکھ کا سانس لیا، بعض ڈرائیورز نے ٹریفک دفتر کے ارد گرد گاڑیاں کھڑی کرلیں۔
تفصیلات کے مطابق جہلم میں اندرون شہر کے وسط میں عرصہ دراز سے قائم غیر قانونی ویگنوں کے اڈے کی وجہ سے شہریوں کودن کے اوقات میں آمدورفت میں سخت مشکلات کاسامنا کرناپڑتاتھا۔
شہریوں کاکہنا ہے کہ شہر کے عین وسط میں قائم غیر قانونی ویگن اسٹینڈ کی وجہ سے اکثر اوقات اولڈ جی ٹی روڈ پر ٹریفک بلاک ہوجاتی تھی جسکی وجہ سے ریسکیو 1122 فائر برگیڈ، ایمبولنسز، چھوٹی گاڑیوں اور موٹر سائیکلز سواروں کوسخت مشکلات کاسامنا کرنا پڑتا تھا۔ ضلعی انتظامیہ نے شہریوں کے دیرینہ مطالبے کو پورا کر کے شہریوں کے دل جیت لیے ہیں۔
قابل ذکر بات یہ ہے کہ ویگن سٹینڈ ختم ہونے کے بعد بعض ڈرائیورز نے ٹریفک دفتر کے ارد گرد ویگنیں کھڑی کرکے سواریاں بٹھاتے دکھائی دیتے ہیں۔
شہریوں نے چیئرمین ڈسٹرکٹ ٹرانسپورٹ اتھارٹی، ڈپٹی کمشنر، قائم مقام سیکرٹری ڈسٹرکٹ روڈ ٹرانسپورٹ اتھارٹی، اسسٹنٹ کمشنر کوراڈینشن موٹروہیکل ایگزمینر اور ڈی ایس پی ٹریفک سے نوٹس لینے اور اندرون شہر سڑکوں پرگاڑیاں کھڑی کرنے والے ڈرائیورز کے خلاف کارروائیاں کرنے کا مطالبہ کیاہے۔
