جہلم: ناقص اشیاء خورد و نوش فروخت کرنے پر سول ہسپتال کی کینٹین سیل ، اسسٹنٹ کمشنر جہلم کے چھاپے کے دوران کھانے پینے کی ناقص اشیاء اور خراب دودھ پکڑا گیا۔
تفصیلات کے مطابق ڈپٹی کمشنر جہلم میثم عباس کی ہدایت پر اسسٹنٹ کمشنر جہلم شمس الرحمن نے عوامی شکایات پر ڈسٹرکٹ ہیڈ کوارٹر ہسپتال جہلم کی کینٹین کا اچانک دورہ کیا۔
معائنے کے دوران کھانے پینے کی اشیاء انتہائی ناقص مٹیریل سے تیار پائی گئیں جبکہ چائے میں استعمال ہونے والا دودھ گندا اور مکھیاں سمیت دیگر حشرات سے آلودہ تھا۔ اسسٹنٹ کمشنر نے برہمی کا اظہار کرتے ہوئے کینٹین کو فوری سیل کرنے اور ٹھیکیدار کے خلاف سخت قانونی کارروائی کا حکم دے دیا۔
اس موقع پر سول ہسپتال کے ایم ایس ڈاکٹر سہیل اور محکمہ صحت کے دیگر افسران بھی موجود تھے۔
اسسٹنٹ کمشنر شمس الرحمن نے کہا کہ شہریوں کی صحت سے کھیلنے والے عناصر کو کسی صورت رعایت نہیں دی جائے گی، خود ساختہ قیمتوں اور ناقص اشیاء فروخت کرنے والوں کے خلاف بلا امتیاز کارروائی جاری رہے گی۔
